5,790 total views
Dismayado ang Head Chaplain ng University of the Philippines-Philippine General Hospital (UP-PGH) Chaplaincy sa posibilidad na walang matatanggap na alokasyon ang pagamutan para sa susunod na taon.
Ayon kay PGH head chaplain, Fr. Lito Ocon, SJ, malaking pasanin ang kakaharapin ng institusyon sakaling tuluyang hindi mabigyan ng pondong kinakailangan para sa pagpapabuti ng serbisyong pangkalusugan.
Ang pahayag ng pari ay kaugnay sa 2024 budget hearing ng kongreso kung saan kabilang sa tinatalakay ang pinagtatalunang P125-milyong Confidential at Intelligence Fund (CIF) ng Office of the Vice President (OVP).
“It was easy for them to transfer P125-million to the OVP for CIF but so difficult to request even a fraction of their CF for hospital equipments,” pahayag ni Fr. Ocon sa panayam ng Radio Veritas.
Sinabi ng pari na ang malaki at kontrobersyal na pondong hinihiling ng tanggapan ng ikalawang pangulo ng bansa ay nakakaapekto sa ibang ahensya, institusyon, at tanggapang higit na nangangailangan ng pondo para sa basic social services.
Bagamat mayroong mga natatanggap na tulong at donasyon mula sa iba’t ibang indibidwal at grupo, iginiit ni Fr. Ocon na kailangan pa rin ng PGH ang suporta ng pamahalaan upang maipagpatuloy ang maayos na serbisyo lalo na sa mga mahihirap na pasyente.
“Ilang milyon lang naman sana ang kailangan ng PGH. Kung ginawa nila ‘yang pag-transfer ng funds to PGH or to any government hospitals, I don’t think may mag- complain… Nakakalungkot, nakakagalit, nakakainis pakinggan ang budget hearing kung paano sila gumagastos, at plano pang humingi ng malaking budget,” ayon kay Fr. Ocon.
Nagsimulang bumaba ang inilalaang pondo sa PGH noong 2020 nang lumaganap ang coronavirus pandemic sa bansa.
Sa General Appropriations Act of 2021, natanggap ng institusyon ang P6.9-bilyong pondo, P6.3-bilyon noong 2022, habang P5.9-bilyon naman ngayong taon.
Magugunita noong kasagsagan ng pandemya ay nanguna ang UP-PGH sa pagtanggap sa mga COVID-19 patients, habang nagpapatuloy naman ang chaplaincy sa aktibong pagtulong at pagtugon sa pangangailangan ng mga mahihirap na pasyente.
