1,148 total views
Ibinahagi ni Gumaca Bishop Euginius Cañete na ang pagpapahid ng banal na langis, lalo na sa mga pastol ng simbahan, ay paalala ng malinaw na misyon ng bawat Kristiyano.
Sa kanyang homiliya sa pagdiriwang ng Misa ng Krisma sa Gumaca Cathedral, iginiit ng obispo na ang pagpapahid ng langis ay hindi lamang simbolo kundi isang pagtatalaga upang higit na maging kawangis ni Kristo at maglingkod sa kapwa, lalo na sa mga nangangailangan.
“We are anointed to bring good news to the poor… Hindi lang tayo mapuspos ng lakas mula sa Espiritu… kundi maging higit na katulad ni Kristo,” ayon kay Bishop Cañete.
Paliwanag ng obispo na ang banal na langis, lalo na ang Krisma, ay tanda ng pagkilos ng Espiritu Santo sa buhay ng mananampalataya, na nagbibigay ng lakas, paggaling at panibagong buhay sa gitna ng karamdaman at pagsubok.
“Para bagang isang bagong buhay ito para sa may sakit… hindi na takot kundi tiwala at pananampalataya,” dagdag ng obispo.
Sa kanyang mensahe sa mga pari ng diyosesis, binigyang-diin ng obispo ang kahalagahan ng pagiging malapit sa kawan sa gitna ng lumalalim na hamon ng panahon.
“Ang pari ay dapat malapit sa tao… marunong makibahagi sa karanasan ng paghihirap ng tao,” dagdag pa ni Bishop Cañete.
Hinimok din ng obispo ang kaparian na yakapin ang diwa ng pagiging sinodal at ng isang Simbahang nakikinig at nakikiisa sa bayan.
“Paring sinodal… hindi diktador, marunong makinig sa tao,” giit pa ng obispo.
Ayon kay Bishop Cañete, nagbabago ang kalagayan ng lipunan at nagiging mas komplikado ang misyon ng kaparian, lalo na sa mabilis na paglago ng teknolohiya, kaya’t kinakailangan ang patuloy na katapatan sa tawag ng Diyos at kakayahang tumugon sa “signs of the times.”
Kasabay ng Misa ng Krisma, muling pinagtibay ng mga pari ng diyosesis ang kanilang pangako sa paglilingkod na isang paanyaya hindi lamang sa kaparian kundi sa lahat ng binyagan na makibahagi sa misyon ni Kristo bilang pari, propeta at hari.
