24,756 total views
Hinimok ng Kanyang Kabunyian Manila Archbishop Jose Cardinal Advincula ang mamamayan na suportahan ang Alay Kapwa 2024.
Sa mensahe ng cardinal, binigyang diin na kasabay ng kuwaresma at paghahanda sa Paschal Triduum ay nararapat paigtingin din ng bawat isa ang habag at awa sa kapwa lalo’t higit sa nangangailangang sektor ng lipunan.
Kinilala ng arsobispo ang malaking tungkulin ng Alay Kapwa na deka-dekadang naglingkod sa pamayanan sa pamamagitan ng mga pangunahing program tulad ng feeding program sa mga kabataang may malnutrisyon.
“The Church, through Alay Kapwa 2024, seeks to help us live out compassion by sharing our blessings with the needy. Alay Kapwa has long served as a channel for generosity to support our social services to the poor and marginalized, victims of calamities and disasters,” bahagi ng liham pastoral ni Cardinal Advincula.
Kaugnay nito ilalalaan ng arkidiyosesis sa Alay Kapwa programs ang malilikom na pondo sa lahat ng second collection sa misa sa loob ng anim na linggo ng kuwaresma o February 18 hanggang March 24, 2024.
“As we continue to provide social services to the poor, it is our fervent prayer that we support Alay Kapwa 2024,” ani Cardinal Advincula.
Tinukoy ng cardinal ang Damayan Program na ipinatutupad ng Caritas Manila, ang social arm ng arkidiyosesis kung saan tinututukan ang pagtulong sa mahihirap na komunidad, kabataan at mga biktima ng iba’t ibang uri ng kalamidad sa buong bansa.
Samantala una nang hinimok ni Radio Veritas President at Caritas Manila Executive Director Fr. Anton CT Pascual ang mamamayan na suportahan ‘Alay-kapwa 40 for 40 Challenge’ o ang pagtitipid ng 40 piso kada araw sa loob ng 40 araw ng kuwaresma o kabuuang 1, 600 piso na gagamitin sa mga programa ng alay kapwa partikular ang feeding program ng simbahan na tumutugon sa usapin ng malnutrisyon sa kabataan gayundin sa mga nasalanta ng kalamidad.
