194,936 total reads
Kapanalig, marahil ikaw ay kabilang sa maraming Pilipinong babad na babad sa Internet at social media. Ayon nga sa mga pinakahuling datos, mahigit 85% ng ating populasyon ay internet users, habang 84.45 million naman ang social media users. Ibig sabihin, halos lahat ng nasa Internet sa atin ay social media users din. Ang mga Pilipino ay nasa Internet din ng mahigit sampung oras kada araw, at mahilig tayong mag Youtube at Facebook. Nakababad tayo dito ng mahigit apat na oras kada araw.
Kapanalig, hindi naman nakakapagtaka na halos nakatali na tayo sa internet at social media – digital naman na ang mundo natin ngayon. Ang kailangan lamang nating suriin dito ay kung paano natin ginagamit ang internet at social media. Para ba sa kabutihan natin ito, o ikakapamahak din natin ang ating tila obsession sa Internet at social media? Ano nga ba ang ginagawa natin online?
May pag-aaral na nagsasabi na marami sa atin, online dahil naglalaro ng online games. Tinatayang mahigit 96% ng mga internet users sa atin ang gumagawa nito. Mayroon ding online dahil nanood ng streaming TV content – mga 98%. Pero kapanalig, di natin maitatanggi na kaya din tayo online ay para sa walang katapusang pagscroll sa mga newsfeeds mula umaga hanggang gabi para sa latest info at updates ng mga kaibigan, sinusundang content creators, o wala lang – scroll lang ng scroll dahil nakasanayan na.
Kapanalig, nagiging produktibo ba ang ating mga buhay kaka-babad sa internet at social media? Nagagamit ba natin ito para ma-improve pa ang ating sarili, komunidad, at lipunan? Kung titingnan ang estado ng ating bayan ngayon, gamit man natin araw-araw ang Internet at social media, hindi naman tayo nagiging productive. Kabaligtaran ata ang nangyayari para sa ilan – nakaka-apekto na ito ng mental health. Isang halimbawa dito kapanalig, ay ang doomscrolling – ang pagbabasa ng mga newsfeeds natin sa mga social media platforms at yung maraming pagkakataon na tila tayo ay nahi-hypnotize na, at nakatutok na lamang tayo sa social media, at ikukumpara ang buhay natin sa mga online friends natin. Sa halip na maging relaxing o masaya ang activity na ito, napupuno na lamang tayo ng anxiety, resentment, at inggit. Marami ng online friendships ang nasira dahil sa maling pag-gamit ng social media -naging pataasan na ng ihi, naging source na ng anxiety at insecurity.
Kapanalig, ang ating pagbabad sa internet at social media ay isang habit na nakakasama na ng ating ugali. Dahil dito, nakakalimot tayo sa kalikasan, sa ating paligid, maski sa ating pamilya, pati na sa Diyos. Dahil sa social media, marami sa atin ang nagiging bulag at nagkakaroon ng mental health issues. Kaya’t sa halip na maging masaya, lalo pang nagiging malungkot, tarantahin, at mapag-alala.
Ngayong kuwaresma, isa sana sa ating i-“fast” ay ang paggamit ng social media at Internet. Kailangan nating mag-disconnect paminsan minsan, kapanalig, para maka-connect naman tayo sa Diyos. Ayon nga kay Pope Francis: ang pagdisconnect sa internet at social media ay esensyal sa ating Christian life. Payo pa niya sa kanyang mensahe para sa 2019 World Communications Day: gamitin natin ang social media para magbuo ng tunay na koneksyon at ugnayan, na may dalang kapayapaan at pag-ibig, hindi poot at kaguluhan.
Sumainyo ang Katotohanan.
