527 total reads
Maging mga kubyertos ay ipinamamahagi na ng Archdiocese of Cagayan De Oro para lamang makatulong sa mga residente na naapektuhan ng kalamidad sa kanilang lalawigan.
Ito ang ibinahagi ni Cagayan De Oro Social Action Director Rev. Fr. Satur Lumba kaugnay sa kanilang ginagawang pagkilos upang umagapay sa mga naapektuhan ng baha.
Sinabi ni Fr. Lumba na mula pa nang maganap ang mga pagbaha sa Cagayan De Oro at Misamis Oriental ay hindi na tumigil ang kanilang hanay sa pagsasagawa ng relief response.
Sa kasalukuyan, kailangan ng mga naapektuhang residente ay mga non-food items na siya namang ipinamahagi na ng Archdiocese habang kumikilos na rin sila para makatulong sa rehabilitasyon ng nasirang kabahayan.
“Noong una binigyan natin ng food packs ang mga tao. After 10 days nakita natin ang mga kailangan sa mga totally damaged houses. Pinuntahan natin at binigyan ng non food items… Binigyan natin sila ng mga plato, kumot, kutsara, tinidor at nag-usap na din kami ng City Council at DSWD. Nagpa-plano na kami sa shelter nila lalo na sa mga totally damaged na bahay.” pahayag ni Fr. Lumba sa panayam ng Radyo Veritas.
Ipinagpasalamat naman ng Arkidiyosesis ang pagtulong na ibinahagi sa kanila ng iba’t-ibang organisasyon partikular na sa bahagi ng Simbahan.
Batay sa pakikipag-ugnayan ng Damay Kapanalig Program ng Veritas 846 sa Caritas Philippines, umabot na sa P600 libong piso ang halaga ng tulong na kanilang ibinahagi sa Archdiocese of Cagayan De Oro at Diocese of Butuan.
Una na rin nagpahayag ang Caritas Manila na magpapadala ito ng isang milyong piso na tulong para sa mga Dioceses na naapektuhan ng pagbaha sa Mindanao.
Lubos din ang pasasalamat ng Diocese of Butuan at Tagum sa tulong na ipinagkaloob ng Caritas Manila sa mga apektado ng baha.
Read: http://www.veritas846.ph/13-parokya-sa-diocese-butuan-lubog-sa-tubig-baha/
(Rowel Garcia)
