13,023 total views
Muling binatikos ng EcoWaste Coalition ang patuloy na paggamit ng ‘plastic labo’ at iba pang single-use plastic materials bilang banderitas sa pagdiriwang ng Kapistahan ng Sto. Niño.
Ito’y matapos mamataan ng grupo ang mga lansangan sa Tondo at Pandacan sa Maynila na puno ng banderitas na nilikha gamit ang mga bagong plastic “labo,” isang uri ng plastic na bihirang nare-recycle o nagagamit muli.
Ayon kay EcoWaste Zero Waste campaigner Ochie Tolentino, ang mga ‘plastic banderitas’ ay mapupunta lamang sa mga tapunan ng basura pagkatapos magdiwang ng fiesta, na nagdudulot ng panibagong hamon sa mga pagsisikap na mapigilan ang plastic pollution sa bansa.
Panawagan ni Tolentino sa mga kinauukulan na bukod sa paghahanda para sa pagdiriwang, dapat tiyakin ding ang mga kinasasakupan ay sumusunod sa mga patakarang mangangalaga sa kalikasan.
“We appeal to our community leaders to go against the tide and forgo the hanging of single-use plastic banderitas, which is not in tune with ongoing efforts to end plastic pollution, a planetary threat to public health and the environment,” ayon kay Tolentino.
Ipinaliwanag ng grupo na ang paggamit ng disposable plastic banderitas sa mga kilalang pagdiriwang tulad ng Kapistahan ng Santo Niño ay salungat sa mga lokal at pandaigdigang hakbang upang labanan ang plastic pollution.
Ito ang dahilan kaya’t napagkasunduan ng mga bansa na bumuo ng isang kasunduan tulad ng global plastics treaty, na ipagpapatuloy ang negosasyon ngayong taon.
Bukod dito, ang paggamit ng single-use plastics ay hindi rin naaayon sa napagkasunduan sa 128th Plenary Assembly ng Catholic Bishops’ Conference of the Philippines (CBCP) noong Hulyo 2024, na suportahan ang mga pagsisikap na labanan ang plastic pollution, isa sa anim na ecological actions na itinakdang pagtutuunang pansin ng simbahan.
Magugunita rin na noong 2019, isinapubliko ng CBCP ang pastoral letter on ecology na “An Urgent Call for Ecological Conversion, Hope in the Face of Climate Emergency,” bilang pagsasabuhay sa mga aral mula sa ensiklikal na Laudato Si’ ng Kanyang Kabanalan Francisco.
“In response to the call for ecological conversion, we appeal to our churches and communities to do away with single-use plastic fiesta banderitas and other wasteful disposables, and make the protection of the environment and people central to our faith-rooted celebrations,” panawagan ng EcoWaste.
