Nilinaw ng Catholic Bishops’ Conference of the Philippines Office on the Protection of Minors and Vulnerable Persons na kukmikilos ang simbahan laban sa mga paring sangkot sa katiwalian lalo na sa usapin ng sexual abuse sa kabataan at mahihinang sektor ng lipunan.
Ayon kay San Carlos Bishop Gerardo Alminaza, Vice Chairperson ng tanggapan iginagalang nito ang proseso ng korte na kasalukuyang nagsasagawa ng pagdinig sa kaso ng mga paring sangkot sa pang-aabuso at hinihintay ang resulta ng imbestigasyon bago maisapubliko.
“Kaya hindi tayo (simbahan) masyado palaging nag-update on that matter kasi some of the cases that we have right now in the Philippines are still ongoing yung investigation sa korte at may principle ng subjudice na hindi pa pwede pag-usapan unless na ang public interest would require it,” pahayag ni Bishop Alminaza sa Radio Veritas.
Iginiit ng obispo na kapag natapos na ang imbestigasyon at may hatol ang korte laban sa pari ay agad itong isapubliko ng simbahan para sa kabatiran ng nasasakupan.
Sinabi ni Bishop Alminaza na sinusunod din ng simbahan ang victims first policy kung saan tinutulungan ang mga biktima ng pang-aabuso ng mga pastol ng simbahan para sa kanilang pangangailangan at makamit ang katarungan.
“Victims first policy naman ang ating simbahan kaya lang we have to also find a way how to do it in reaching out sa pagtulong sa mga victims dahil nga that can also be misinterpreted na bina-bribe o sina-silence natin ang mga victims na hindi magpatuloy sa complaints,” dagdag ng opisyal.
Nanindigan ang opisyal na bagamat may ibang mga biktima ang hindi nagpapatuloy sa pagsampa ng reklamo ay pinag-aaralan ng simbahan ang kaso at nagkakaroon ng imbestigasyon na kung mapapatunayang guilty ang isang pari ay papatawan ito ng parusa alinsunod sa isinasaad ng canon law at kung inosente naman sa reklamo ay magkakaroon ng reparation para sa nasirang reputasyon.
Ayon pa kay Bishop Alminaza “Kahit yung processes to coordinate, to cooperate with the civil government or Philippine courts para mag-inquire ng procedure at guidance sa Philippine laws careful din kami kasi that can even be also misinterpreted as parang we are trying to broker or parang mag-influence ng mga desisyon using the weight of our authority in favor of the priest.”
Sa ginanap na “Zero Tolerance” summit ng Ending Clergy Abuse at sa ulat ng US-based watchdog BishopAccountability.org nasa 82 pari at religious brothers sa Pilipinas ang sangkot sa mga pang-aabuso kung saan ilan sa nasa listahan ay pumanaw na.
Humingi ng paumanhin at pang-unawa si Bishop Alminaza sa mga biktima ng pang-aabuso at hinimok ang mamamayan magtulungang idulog sa mga nararapat na tanggapan ang mga pang-aabusong kinasasangkutan ng mga pari at iba pang lingkod ng simbahan dahil ito ay bahagi ng tungkulin at pananagutan bilang mga pastol ng simbahang katolika.
“Sama-sama tayo to keep the church safe for everybody and we are all committed to protect everyone, kung meron kayong nalalaman, meron kayong dapat i-complain, lapit lang kayo kasi obligated kami bawat diocese to really accept all this. And kami mismo na mga obispo, pwede kaming subject for penalty or neglect of our duty kung we will not do as we are required to do,” giit ni Bishop Alminaza.
Ibinahagi rin ng obispo na kabilang sa formation ng mga seminarista at mga pari ang safeguarding laban sa mga pang-aabuso sa kabataan at kababaihan kaya’t magkakaroon ng malawakang pagtitipon sa Oktubre ng kasalukuyang taon sa inisyatibo ng CBCP Office for the Protection of Minors and Vulnerable Persons kung saan inaasahang dadalo ang mga obispo ng Pilipinas at mga mapipiling kinatawan ng bawat diyosesis na mangangasiwa sa kani-kanilang safeguarding office.
