7,398 total reads
Hinamon ni Gumaca Bishop Eugenius Cañete, MJ ang pamahalaan, mamamayan, at Simbahan na magkaisa para sa pagkakaroon ng makatarungan at tunay na pagbabago sa lipunan.
Kaugnay ito sa inilabas na liham ng diyosesis bilang panawagan para sa maayos na mga pangunahing lansangan sa lalawigan ng Quezon.
Ayon kay Bishop Cañete, matagal nang suliranin ng lalawigan ang mga sira-sira at baku-bakong lansangan na nakaaapekto na sa pang-araw-araw na pamumuhay ng mamamayan.
“Bilang isang sambayanan, naglalahad kami ngayon ng bukas na liham sapagkat malinaw na hindi napapakinggan ang hinaing ng mga mamamayan sa social media. Pang-araw-araw nang viral sa Facebook ang mga reklamong may kasama pang larawan at video ng mga sira-sirang daan, heavy traffic, mga nabubulok na produkto, at mga aksidente,” pahayag ni Bishop Cañete.
Ibinahagi ng obispo na noong nakaraang taon, marami ang nagpasiyang hindi na umuwi sa mga probinsya dahil sa takot na maulit ang mga karanasan sa pagdaan sa mga highway ng Quezon.
Bagamat may mga pagsasaayos na isinasagawa ang pamahalaan, sinabi ni Bishop Cañete na ang mga ito’y pansamantala lamang at panakip-butas, kaya’t kalauna’y nagdudulot muli ng abala sa publiko.
Ipinahayag din ng obispo, kasama ang mga pari at layko ng diyosesis, ang kanilang pagkadismaya sa karaniwang tugon ng mga kinauukulan, partikular ang Department of Public Works and Highways (DPWH).
“Ang karaniwang tugon na aming nakukuha mula sa kanila ay: “Walang budget.” “Hindi sakop ng kanilang opisina ang maintenance and repair ng partikular na bahagi ng Quezon highway.” “Wala silang kakayanang ayusin ang sira-sirang highway.” Hindi namin maiwasang magtanong, “Bakit, sa pangkalahatan, higit na malalapad, makikinis, at kaaya-ayang maglakbay sa mga highway ng ibang lalawigan ng CALABARZON?,” ayon kay Bishop Cañete.
Para kay Bishop Cañete, ang sira-sirang lansangan ay hindi lamang usapin ng imprastraktura kundi sumasalamin ng mas malalim na suliranin sa pulitika sa bansa.
Iginiit ng obispo na dahil sa mga pansariling kapakanan ng mga nasa kapangyarihan, naisasantabi na ang kanilang tunay na gampanin—ang pagiging tapat sa paglilingkod at ang pagsasaalang-alang sa kapakanan ng nakararami.
“Ginagamit nila ang yaman ng bayan para makapanatili sa kapangyarihan habang kinakaligtaan ang pangkalahatang kabutihan, lalo na ng mga higit na nangangailangan,” saad ng obispo.
Gayunman, naniniwala si Bishop Cañete na mayroong mga tapat at mabubuting lingkod-bayan na makikinig sa panawagan ng mamamayan at handang makipagtulungan upang matugunan ang mga suliranin ng lipunan.
“Pinanghahawakan namin ang likas na kabutihan at malasakit ng mga taong nasa gobyerno. Umaasa din kami na marami ang handang makipagtulungan upang isulong ang mabuti at pigilan ang lumalaganap na sistema ng kurapsyon sa ating minamahal na bayan,” ayon kay Bishop Cañete.
