7,440 total reads
Binigyang-pugay ng EcoWaste Coalition ang buhay at paglilingkod ng yumaong human rights defender at Albay 1st district representative Edcel Lagman.
Ayon kay EcoWaste national coordinator, Aileen Lucero, kilala si Lagman sa paninindigan laban sa hindi makatarungang utang, pangangalaga sa kalikasan, at pagtataguyod ng dignidad ng tao.
“Known to many as a man of principle and action, Rep. Lagman valiantly fought for causes meant to defend human dignity, rectify injustice and uplift people’s lives, including the cancellation of illegitimate debts,” ayon kay Lucero.
Kabilang sa mga mahahalagang nagawa ng yumaong mambabatas ang pagsuporta sa kampanya laban sa nabigong proyektong Austrian medical waste incinerator na binili ng pamahalaan noong 1997 sa halagang mahigit P500-milyon.
Dahil hindi pumasa ang mga incinerator sa emission tests at lumabag sa Clean Air Act, ipinasara ito noong 2003.
Gayunpaman, patuloy pa ring binabayaran ng pamahalaan ang utang na may kaugnayan sa proyekto hanggang 2014.
Ibinahagi naman ni Gubat, Sorsogon Mayor Ronnel Lim, na siyang lead author ng Toxic Debt: The Onerous Austrian Legacy of Medical Waste in the Philippines, na malaki ang naging ambag ni Lagman upang mapahinto ang pagbabayad ng nasabing utang lalo na noong kasagsagan pandaigdigang krisis mula 2007 hanggang 2009.
“We remember with utmost gratitude the help extended by Rep. Lagman in bringing the failed Austrian medical waste incinerator project to the attention of his fellow lawmakers, and the justness of cancelling the debt payments during the difficult period of global financial crisis in 2007-2009,” ayon kay Lim.
Nakatuwang ni Lagman si dating Akbayan Partylist Representative at kasalukuyang Senador Risa Hontiveros sa pagpapahinto ng pagbabayad sa utang, na naging bahagi ng ‘Stop Toxic Debt! Campaign’.
Bukod dito, kinilala rin ng EcoWaste Coalition ang suporta ng yumaong mambabatas sa BANtay Endosulfan campaign, na nanawagan para sa agarang pagbabalik sa pinagmulan ng nakakalasong endosulfan pesticide, na nakuha mula sa lumubog na MV Princess of the Stars noong 2008.
Nanindigan si Lagman na hindi kailangang panatilihin ang mapanganib na kemikal sa bansa upang patunayan ang kaso sa korte.
