8,423 total reads
Pinuri ng Student Christian Movement of the Philippines (SCMP) ang Catholic Educational Association of the Philippines (CEAP) at iba pang mga educational institutions sa bansa na nagpahayag ng paninindigan sa patuloy na pagsusulong ng diwa ng EDSA People Power Revolution.
Ayon kay SCMP National Chairperson Kej Andres, mahalaga ang paninindigan ng mga institusyong pang-edukasyon sa bansa upang matiyak na mabuksan ang kamalayan ng mga kabataan sa mga tunay na pangyayaring naganap sa kasaysayan ng bansa noong panahon ng batas militar sa ilalim ng rehimen ni dating Pangulong Ferdinand Marcos Sr.
Partikular na kinilala ng Student Christian Movement of the Philippines (SCMP) ang deklarasyon ng mga institusyong pang-edukasyon ng non-academic working days sa February 25, 2025 upang bigyan ng pagkakataon ang mga mag-aaral at mga kawani na makibahagi sa mga gawing may kaugnayan sa paggunita ng ika-39 na anibersaryo ng EDSA People Power Revolution.
“We laud CEAP NCR and other educational institutions in designating February 25 as non-academic working days encouraging participation of events on that day. Despite the virtually meaningless declaration of President Ferdinand Marcos Jr. to declare February 25 as a working holiday, educational institutions are continuing the tradition of standing up against historical distortion being plotted by the family that imposed the oppressive martial law,” Bahagi ng pahayag ni Andres.
Pagbabahagi ni Andres, bagamat halos apat na dekada na ang lumipas mula ng naganap ang EDSA People Power Revolution noong 1986 ay patuloy namang nararanasan magpahanggang sa ngayon ang mga epekto ng diktaduryang Marcos Sr. kabilang na ang mataas na presyo ng mga bilihin, campus militarization, iba’t ibang pang-aabuso sa karapatang pantao at pagsunod sa mga dayuhang kapangyarihan.
“We, youth and students, while not part of the People Power Uprising, continue to carry the heavy crosses of the Marcos Sr. dictatorship: high prices, campus militarization, curtailment of human rights, and subservience to foreign powers. Thus, the Marcos Jr. administration must only expect leaps and bounds of students to exercise our militant and collective tradition, furthering the spirit of EDSA People Power towards the full realization of our nationalist and democratic aspirations” Dagdag pa ni Adres.
Aabot sa 1,525 ang bilang ng mga member-schools ng CEAP na pawang hinihikayat nitong makibahagi sa paggunita ng ika-39 na anibersaryo ng EDSA People Power Revolution.
Kabilang naman sa mga paaralang una ng nagdeklara ng non-academic working days sa ika-25 ng Pebrero, 2025 ang Immaculate Conception Academy, La Salle Green Hills, Saint Pedro Poveda College, De La Salle University, Xavier School, University of Santo Tomas, at University of the Philippines.
