16,514 total reads
Nananawagan ang Caritas Caceres sa Naga ng karagdagang mga PPCRV volunteers para sa nalalapit na 2025 Midterm Elections sa darating na May 12, 2025.
Bahagi ng panawagan ng social action arm ng arkidiyosesis ang pakikibahagi sa pagsusulong ng pagbabago sa lipunan sa pamamagitan ng pagbabantay sa kabuuang proseso ng halalan bilang kasapi ng Parish Pastoral Council for Responsible Voting (PPCRV) sa Arkidiyosesis ng Caceres.
Ayon sa Caritas Caceres, mahalaga ang pakikibahagi ng bawat isa upang ganap na mabantayan at maprotektahan ang kasagraduhan ng boto ng bawat mamamayang Pilipino.
“Make change happen. Be a PPCRV volunteer! Join us is ensuring a clean, honest, accurate, meaningful, and peaceful election this May 2025. Be a Parish Pastoral Council for Responsible
Voting Volunteer and help protect the sanctity of the vote!” Bahagi ng panawagan ng Caritas Caceres.
Una ng inihayag ni Caceres Archbishop Rex Andrew Alarcon na siya ring National Spiritual Director ng PPCRV na mahalaga ang tungkuling ginagampanan ng PPCRV at mga volunteers nito sa buong bansa upang matiyak ang patuloy na pag-iral ng demokrasya sa pamamagitan ng pagbabantay sa pagkakaroon ng matapat, mapayapa at malinis na halalan sa bansa.
Kinilala rin ni Archbishop Alarcon ang pagsusumikap ng PPCRV na maimulat ang kamalayan ng mga Pilipino sa kahalagahan ng kanilang boto para sa kapakanan at kinabukasan ng buong bansa.
Mula ng maitatag ang PPCRV noong 1991 na layunin maging pangunahing tagapagbantay ng Simbahang Katolika sa pagkakaroon ng isang maayos at tapat na eleksyon sa Pilipinas ay umaabot na sa kasalukuyan sa 700-libo ang volunteers nito mula sa may 86 na diyosesis sa buong bansa.
