12,668 total reads
Nanawagan si Pagadian Apostolic Administrator, Ozamis Archbishop Martin Jumoad, na ihinto ang lahat ng operasyon ng pagmimina sa Zamboanga del Sur upang mapigilan ang masamang epekto ng pagmimina sa kalikasan ng lalawigan.
Binigyang-diin ni Archbishop Jumoad sa kanyang pastoral letter na unti-unting napipinsala ang kapaligiran dahil sa patuloy na pagpapahintulot sa ilegal na minahan, kung saan nakababahala rin ang pagdagsa ng mga bagong aplikasyon para sa operasyon sa lugar.
“I advocate for a moratorium on all forms of mining in our province. While it is true that there are such things as legal or responsible mining practices, it is crucial to first determine whether these operations can genuinely contribute to the development of the majority of our community,” bahagi ng pahayag ni Archbishop Jumoad.
Tinukoy ng arsobispo na mayroong aktibong pagmimina sa siyam na bayan sa Zamboanga del Sur, ito ang Dumingag, Mahayag, Midsalip, Bayog, Pitogo, Dimataling, Tabina, at Tigbao.
Apela ni Archbishop Jumoad sa publiko na maging mapagmatyag at kumilos upang mapangalagaan ang kapaligiran at komunidad mula sa mapaminsalang epekto ng pagmimina.
“We need to remain vigilant to avoid facing the same disastrous effects of mining that have occurred in other locations… Let us stay aware and take action to protect our environment and communities from the devastating impacts of mining,” ayon sa arsobispo.
Hinimok din ng arsobispo ang mga opisyal ng pamahalaan at mga ahensya na pigilan ang patuloy na paglaganap ng ilegal na pagmimina sa iba’t ibang panig ng bansa at magsagawa ng masusing pagsusuri sa epekto nito bago magbigay ng panibagong permit.
Noong nakaraang buwan, nagtipon sa bayan ng Dumingag ang ilang residente mula sa iba’t ibang parokya, kasama ang ilang pari, upang ipahayag ang pagtutol sa ilegal na pagmimina.
Sinabi ni Archbishop Jumoad na kailangang maging handa ang mamamayan upang hindi maranasan ng Zamboanga del Sur ang matinding pinsalang dulot ng pagmimina sa ibang mga lugar.
“I would like to remind everyone that we cannot treat every mountain as a bank of money, and the land merely as a capital for more profit. We and our future generations need the serenity of the mountains. We need the songs of the birds. We need the peace of the forests. We need to connect with the entire web of creation, for life cannot be sustained without our common home—the environment,” giit ni Archbishop Jumoad.
