13,254 total views
Naniniwala si Tagbilaran Bishop Alberto Uy na ang tunay na kalayaan ay hindi lamang kalayaang pampulitika at pang-ekonomiya kundi maging kalayaang pang-espiritwal.
Ito ang bahagi ng mensahe ni Bishop Uy kaugnay sa paggunita ng ika-127 na Araw ng Kalayaan ng Pilipinas kung saan binigyang pagkilala rin ng Obispo ang kabayanihan at katapangan ng mga Pilipinong nagsakripisyo para sa kasarinlan ng bansa.
Pagbabahagi ng Obispo, kabilang sa dapat na isulong sa lipunan ang kalayaang nagmumula sa Panginoon na nagdudulot ng ganap na kalayaan mula sa kasalanan, takot, pangamba, galit at iba pang sitwasyong nagpapahirap sa bawat indibidwal.
“As we celebrate the 127th anniversary of Philippine Independence, we honor the courage and sacrifice of those who fought for our nation’s freedom. But as Christians, we are also reminded that the deepest kind of freedom is not just political or economic. It is spiritual. True freedom is the freedom that comes from God—freedom from sin, fear, hatred, and all that enslaves the human heart.” Bahagi ng pahayag ni Bishop Uy.
Binigyang diin naman ni Bishop Uy na dapat na magsimula sa sarili ang tunay na pagbabago, kalayaan at kaunlaran na ninanais ng bawat isa para sa bansa sa halip na hintayin itong magmula sa iba o sa kapwa.
Paliwanag ng Obispo, kung nais ng bawat isa ang bansa kung saan umiiral ang katotohanan at habag ay dapat ring ang bawat isa ay maging mamamayang makatotohanan at mahabagin.
“We cannot wait for change to come from the top, or from others. Real change begins with ourselves. If we want a better Philippines, we must start by becoming better Filipinos. If we want a nation of truth and compassion, we must be people of truth and compassion.” Dagdag pa ni Bishop Uy.
Kabilang naman sa mga tinukoy ni Bishop Uy na sitwasyon na nagpapahirap at sumisiil sa kalayaan ng mga Pilipino ang iba’t ibang uri ng katiwalian sa lipunan na nag-aalis ng dignidad at katarungan mula sa taumbayan; ang hindi patas na pag-iral ng batas sa mga mahihirap at mayaman; ang kahirapang pang-ekonomiya na kinahaharap ng mga simpleng mamamayan.
Pinuna rin ng Obispo ang patuloy na pag-iral ng karahasan at pagkalolong sa ipinagbabawal na gamot ng ilang mamamayan; ang patuloy na pagtaas ng kaso ng HIV-AIDS sa mga kabataan; ang paglaganap ng mga dumaranas ng mental health struggles sa lipunan; at ang paglaganap ng mga maling impormasyon, disinformation, misinformation at fake news na dulot ng pag-iral ng Artificial Intelligence and digital manipulation sa kasalukuyang panahon.
Binigyang diin naman ni Bishop Uy na mahalagang ipanalangin ang patuloy na paggabay ng Panginoon upang tuwinang malagpasan ng bansa ang mga kinahaharap nitong suliraning panlipunan hindi lamang sa usaping pambansa kundi maging sa kalagayang pang-espiritwal ng bawat mamamayan.
Tema ng ika-127 na Araw ng Kalayaan ngayong taong 2025 ang “Kalayaan. Kinabukasan. Kasaysayan” na layuning isulong ang pagbabalik-tanaw ng bawat mamamayan sa kasaysayan ng bansa bilang gabay at aral sa kinabukasan ng Pilipinas.
