22,192 total views
Kinundena ni Taytay Palawan Bishop Broderick Pabillo ang patuloy na paghahari ng kasikiman sa puso ng mga tao na nagdudulot ng pagkalulong sa bisyo katulad ng sugal o online gambling.
Ayon kay Bishop Pabillo, sa matinding paghahangad ng tao na yumaman ang nag-uudyok sa marami na malulong sa masamang bisyo katulad ng online gambling.
Itinuturing ng Obispo ang online gambling na bagong “pandemyang”sumisira sa buhay ng mga Pilipino at kanilang pamilya.
“Pati ang Diyos ay dinadaya natin, kaya nga pati ang simbahan ay ninanakawan, kinukupitan. Para sa iba, ginagamit ang Diyos para magkaroon ng pera, kaya hindi nagbibigay ng proper accounting ng pera ng simbahan. Walang transparency. Nakakalimutan yata natin ang maliwanag na sinabi ni Jesus na hindi tayo makapaglilingkod sa dalawang panginoon– sa pera at sa Diyos. Maaaring gamitin natin ang pera para sa Diyos o di kaya gamitin natin ang Diyos para sa pera,” ayon sa pagninilay ni Bishop Pabillo.
Ipinaliwanag ni Bishop Pabillo na maibabalik natin ang buhay sa panginoon sa pagkilala na ang kasakiman ay ugat ng lahat ng kasamaan.
Hinhimok ng Obispo ang lahat na gamitin ang pera at yaman sa wastong pamamaraan at pagbibigay prayoridad sa pangangailangan maging sa pagkawanggawa.
“Pinapaalaala ng mga pagbasa natin ngayon na isipin natin na hindi natin mahahawakan ang anumang bagay sa mundo. Sinabi ng Mangangaral sa unang pagbasa natin na walang kabuluhan, parang bula lamang, ang mga bagay sa mundo. Nakakita na tayo ng mga bata na naglalaro ng bula ng sabon. Ang ganda ng bula. Makulay at bilog na bilog na lumilipad, pero hindi natin mahawakan. Kapag pumatong sa ating kamay sila ay pumuputok, naglalaho. Ganyan ang kayamanan sa mundo,” bahagi pa ng pagninilay ni Bishop Pabillo.
Sa datos ng Recovering Gamblers of the Philippines, 80% sa kanilang mga rehab patient ay pawang mga biktima ng online gambling na bukod sa pagkalugi sa pera ay nagdulot din ng depresyon, pagkasira ng buhay, pamilya at relasyon sa kapwa.
