34,063 total views
Nanawagan si University of the Philippines–Philippine General Hospital (UP-PGH) head chaplain, Fr. Marlito Ocon SJ, sa Department of Public Works and Highways (DPWH) at sa mga mambabatas na tiyakin ang wastong paggamit ng pondo para sa flood control, kasunod ng naranasang matinding pagbaha sa Maynila kamakailan.
Ayon kay Fr. Ocon, sa kabila ng bilyon-bilyong pondo na nakalaan sa flood control—₱351 bilyon noong 2024 at ₱349 bilyon ngayong 2025—patuloy pa rin ang lumalalang pagbaha kada taon.
Isinalaysay ng pari na unang beses niyang masaksihan ang paglilinis ng drainage system sa kahabaan ng Taft Avenue at Padre Faura Street sa kasagsagan ng baha, kung saan nakita niya ang mga manggagawang walang tamang kagamitan at safety attire, at gumagamit lamang ng bamboo stick at lumang lubid sa paglilinis.
“DPWH or Contractor? Kahiya-hiya naman kayo, sa laki ng budget, ang gamit nila bamboo stick, lumang lubid? At wala pang safety attire ang mga workers na lumusob sa ilalim ng culverts,” ayon kay Fr. Ocon
Nag-aalala rin si Fr. Ocon na walang ibinibigay na gamot para maiwasan ang leptospirosis sa mga lumulusong sa maruming tubig.
Dahil dito, nanawagan ang pari sa DPWH, mga project contractor, at mga mambabatas na maging tapat sa paggamit ng pondo at tiyaking mabigyan ng sapat na kagamitan at proteksyon ang mga manggagawa.
“Mahiya naman kayo! And I would like to beg, maawa naman kayo. Minimum lang ang sweldo nitong mga lumulusob at sumisisid sa baha, habang kayo ay nagpapakasasa at nagpapakasawa sa pera ng madla. If you cannot be honest in using government funds, pakiusap nalang, kahit paki-provide naman sila ng proper and safety attire, or a little advance equipments naman, kung may awa kayo,” giit ni Fr. Ocon.
Kaugnay nito, kasabay ng paglulunsad sa “Sumbong sa Pangulo” website, isang online platform na nagbibigay sa publiko ng access sa listahan ng flood control projects sa bansa at magsisilbing mekanismo ng check and balance, iniutos ni Pangulong Ferdinand Marcos, Jr. ang imbestigasyon sa ₱545 bilyong pondo para sa flood control, matapos matuklasang 20% nito ay napunta lamang sa 15 contractors.
Bago pa man ito, binigyang-diin na ni Catholic Bishops’ Conference of the Philippines president, Kalookan Bishop Pablo Virgilio Cardinal David na pinalalala ng katiwalian sa pamahalaan ang masamang epekto ng climate change na nagdudulot ng mas malalakas na bagyo, kaya’t mahalagang isabay sa mga flood control project ang mahigpit na “corruption control.”
