37,229 total views
Mariing tinutulan ng Alyansa Tigil Mina (ATM) at ilang civil society organizations ang plano ng Asian Development Bank (ADB) na mamuhunan sa mga mining project sa ilalim ng “Critical Minerals for Clean Energy Technologies” (CM2CET) approach.
Sa isinagawang malikhaing kilos-protesta sa harap ng ADB Headquarters sa Mandaluyong City, sinabi ni Jaybee Garganera, National Coordinator ng ATM, na nalalagay sa alanganin ang ADB dahil sa pagpopondo nito sa mas maraming pagmimina kapalit ng pagkasira ng biodiversity, yamang-tubig, at karapatan sa lupa.
Binigyang-diin ni Garganera na ang pagmimina ng mga critical minerals tulad ng nickel at copper ay maaaring lumikha ng tinatawag na “sacrifice zones.”
“Mining of critical minerals such as nickel and copper will potentially create ‘sacrifice zones’ – where governments and mining corporations sacrifice fragile island ecosystems, critical watersheds, and Indigenous Peoples’ and the community’s human rights for what is conveniently touted as the ‘greater good,” ayon kay Garganera.
Tinawag din niyang rebranding ang CM2CET at “Climate Smart Mining” upang magmukhang hindi mapaminsala ang epekto ng pagmimina, tulad ng paggamit ng terminong “responsible mining” para makakuha ng mas malawak na pagtanggap ng publiko.
Dagdag pa ni Garganera, magkakaiba ang kahulugan ng bawat bansa sa “critical minerals” kaya dapat tanungin kung sino talaga ang nakikinabang batay sa pamantayan ng ADB.
“Countries define what minerals are critical to their industries or national security. Different countries have different lists of critical minerals. A critical mineral for Germany or the US is not necessarily a critical mineral for Indonesia or the Philippines. The question therefore is: Who is actually benefiting from extracting ‘critical minerals’, as defined by ADB?” saad ni Garganera.
Batay sa tala ng United States Geological Survey (USGS) noong 2024, nakapagtala ang Pilipinas ng produksyon na humigit-kumulang 330,000 metric tons ng nickel, dahilan para manatili ito sa hanay ng mga nangungunang nickel producer sa buong mundo.
Tinatayang 27% ng global nickel reserves ay matatagpuan sa Pilipinas at Indonesia, kaya target ang dalawang bansa sa pagpapalawak ng critical mineral supply chains.
Sa Laudato Si’, binigyang-diin ng yumaong Papa Francisco ang pinsalang hatid ng pagmimina na labis na nagpapahirap sa kalikasan at mga apektadong pamayanan.
