25,252 total views
Magsasagawa ng public forum ang Negrosanon Initiative for Climate and the Environment (NICE) katuwang ang Caritas Bacolod Social Action Foundation, Inc., upang talakayin ang lumalaking usapin hinggil sa epekto ng palm oil plantation sa Negros Occidental.
Ito ang “Promises vs. Reality: A Public Forum on the Social and Environmental Impacts of Palm Oil Plantation in Candoni, Negros Occidental,” na gaganapin sa August 26, 2025, ala-una ng hapon sa St. John Marie Vianney Conference Hall, San Sebastian Cathedral, Bacolod City.
Kabilang sa mga magiging tagapagsalita sina San Carlos, Negros Occidental Bishop Gerardo Alminaza; Philippine Biodiversity Conservation Foundation Inc. executive director Lisa Paguntalan-Marte; Negrosanon Initiative for Climate and the Environment representatives Grid Alila, at Junjun Mojica; at National Commission on Indigenous People – Negros Occidental officer-in-charge Milina Jeruta.
Layunin ng forum na talakayin ang pangakong kaunlaran mula sa palm oil plantation kumpara sa tunay na epekto nito sa kapaligiran at kabuhayan ng mga pamayanan sa Candoni.
Hinihikayat naman ang publiko na makibahagi sa talakayan para sa mas pinagbuklod na pagkilos tungo sa pangangalaga ng kalikasan at karapatan ng mga apektadong komunidad.
Para sa karagdagang impormasyon, makipag-ugnayan sa 0995-750-3932 o mag-email sa [email protected].
Sa Laudato Si’, binigayang-diin ng yumaong Papa Francisco na bagamat mahalaga ang pag-unlad, dapat itong isulong nang may paggalang sa kalikasan, kultura, mahihirap, at lahat ng nabubuhay sa mundo.
