25,550 total views
Nanawagan ang isang opisyal ng Catholic Bishops’ Conference of the Philippines (CBCP) sa mga Pilipino na huwag matakot na manindigan para sa katotohanan at kabutihan ng bayan.
Ito ang bahagi ng mensahe ni Taytay Palawan Bishop Broderick Pabillo, chairman ng CBCP- Episcopal Office on Stewardship kaugnay sa paggunita ng National Heroes Day o Araw ng mga Bayani sa bansa.
Ayon sa Obispo, ang paggunita sa Araw ng mga Bayani ay hindi lamang isang pagkakataon upang alalahanin at bigyang pugay ang mga bayani na nag-alay ng buhay para sa kalayaan ng bansa, kundi isa ring paalala sa tungkulin ng bawat isa na magpakabayani sa pamamagitan ng sariling paraan at kakayahan para sa kabutihan ng sambayanan o ng common good.
“Inaalala po nating muli ang Araw ng mga Bayani dito po sa ating bansa kaya po dahil po dito ay sana tayo rin ay hinihikayat na manindigan para sa katotohanan, manindigan para sa bayan. Sa pag-alala po ng Araw ng mga Bayani ay ang panawagan din sa atin na huwag tayong matakot na manindigan, magpakabayani para po sa ating bayan.” Pahayag ni Bishop Pabillo sa Radyo Veritas.
Pagbabahagi ni Bishop Pabillo napapanahon rin ang paggunita ng Araw ng mga Bayani upang ipapanawagan ang higit na pagtutulungan at paninindigan ng bawat Pilipino sa gitna ng mga hamong kinahaharapan ng lipunan.
Paliwanag ng Obispo ang pagiging tunay na bayani ay hindi lamang nasusukat sa pag-aalay ng buhay sa gitna ng digmaan kundi sa araw-araw na pagsusumikap na maisabuhay ang pananampalataya at pagmamahal sa bayan at kapwa sa pamamagitan ng paggawa ng mabuti at tama.
Tema ng National Heroes Day ngayong taon ang “Isang Diwa, Isang Lahi, Isang Bayanihan” o (One Spirit, One Race, One Bayanihan) na layuning isulong ang pagkakaisa ng lahat para sa kabutihan ng bayan.
Alinsunod sa Batas Republika Blg. 9492, s. 2007, itinakda ang huling Lunes ng Agosto bilang pambansang pista opisyal upang ipagdiwang ang Araw ng mga Bayani para kilalanin at alalahanin ang sakripisyo at kabayanihan ng mga Pilipino mula sa iba’t ibang panahon ng kasaysayan ng bansa.
