36,476 total reads
Umaasa si Manila Archbishop Jose Cardinal Advincula na higit pang mapapalawig ang misyon ng Radyo Veritas sa pagpapalaganap ng Mabuting Balita hindi lamang sa Pilipinas kundi maging sa iba’t ibang panig ng mundo.
Ito ang naging mensahe ng Kardinal sa ginanap na pagpapasinaya at pagbabasbas ng bagong transmitter site ng himpilan sa Longos, Meycauayan, Bulacan noong Setyembre 8, kasabay ng pagdiriwang ng kapanganakan ng Mahal na Birheng Maria.
Bilang chairman ng himpilan, binigyang-diin ni Cardinal Advincula na ang bagong pasilidad ay mahalagang katuwang ng simbahan sa misyon ng ebanghelisasyon.
“Dahil mayroon na tayong ganitong facility, mas lalo nating magagampanan ang ating misyon, ang ating tungkulin na lalong maipalaganap ang Mabuting Balita ng Panginoon hindi lamang sa mga karatig pook ng Archdiocese of Manila kundi sa mas malayong bahagi ng ating bansa at sa buong mundo,” ani Cardinal Advincula sa Radyo Veritas.
Kaugnay nito, inihalintulad ng Kardinal ang okasyon sa ginanap na canonization ni St. Carlo Acutis, na kinikilalang “first millennial saint” at patron ng internet.
“We gather a day after the canonization of a saint who inspires us to minister through the modern means of social communications,” dagdag ng Kardinal.
Aniya, ang pagbubukas ng pasilidad ay isang konkretong pagsasabuhay sa utos ni Hesus na “humayo at ipalaganap ang Mabuting Balita sa buong mundo.”
Samantala, iginiit din ni Radyo Veritas President and Chief Executive Officer Fr. Roy Bellen na ang bagong pasilidad ay hamon at inspirasyon upang ipagpatuloy ng himpilan ang kanilang misyon.
“This new transmitter site is our bold statement and testament to continue the mission of Radyo Veritas in bringing the Gospel to every corner of the world, especially the local church in the Philippines. We commit to maximizing media use in the call of new evangelization,” ayon kay Fr. Bellen.
Dumalo rin sa nasabing pagdiriwang sina Malolos Bishop Dennis Villarojo, RCAM Vicar General Msgr. Reginald Malicdem, at mga pari mula sa RCAM Engineering Department na sina Frs. Jomar Burgos at Jeff Jamias. Kasama rin ang mga kinatawan ng Broadcast World Philippines, mga opisyal ng St. Francis of Assisi Parish ng Meycauayan, at ilang kinatawan ng lokal na pamahalaan ng Bulacan, Meycauayan, at Barangay Longos.
