6,334 total reads
Itinatag ng Archdiocese of Manila ang Ministry with Persons in Street Dwelling Situations bilang tugon sa panawagan ng simbahan na maging “simbahan ng mga dukha.”
Ayon kay Manila Archbishop Jose Cardinal Advincula, ang bagong ministeryo ay magsisilbing katuwang ng mga mahihirap at hindi lamang bilang benepisyaryo ng simbahan.
“The Church is called to unite herself in the lived struggles of persons in street-dwelling situations—the silently suffering Lazarus of our time, cast aside into the margins of cities that feast,” pahayag ni Cardinal Advincula.
Itinalaga ng kardinal si Fr. Francisco Nicolás Magnaye Jr., CM, isang Vincentian missionary, bilang unang tagapangasiwa ng ministeryo.
Tiwala ang cardinal sa kakayahan ni Fr. Magnaye dahil sa karisma ng kanilang kongregasyon sa pagkalinga sa mga mahihirap at mga nasa lansangan, ayon sa halimbawa ni San Vicente de Paul.
Binigyang-diin ni Cardinal Advincula na nakaugat ito sa Catholic Social Teaching, na nagsusulong ng karapatan at dignidad ng bawat tao, lalo na ang mga kabilang sa pinakamahihina at madalas na biktima ng kawalang-katarungan.
“There is a need to create and establish a multi-sectoral support system that helps persons in street-dwelling situations transition away from street life to empowered, self-sufficient communities fully integrated into the Church and society,” dagdag ng kardinal.
Batay sa datos ng DePaul International, isa sa mga organisasyon ng Vincentian Family, tinatayang mayroong 4.5 milyong homeless sa Pilipinas, kung saan halos two-thirds ay nasa Metro Manila.
Tiniyak ng arsobispo na patuloy na kikilalanin at pagtutuunan ng pansin ng simbahan ang mga nasa lansangan at iba pang mahihinang sektor ng lipunan.
