3,526 total reads
Wala nang isasagawang pagdinig ang House Committee on Infrastructure o InfraCom kaunay sa iregularidad sa mga flood control projects.
Ito ayon kay InfraCom lead chairman Rep. Terry Ridon ay bilang tugon sa kahilingan ni House Speaker Bojie Dy, upang bigyang-daan ang imbestigasyon ng Independent Commission for Infrastructure o ICI.
Ayon kay Ridon, kasama sa hakbang na ito ang pagsasalin ng lahat ng ulat, transcript, at mga dokumentong ebidensya ng komite sa ICI.
“The Infracomm will turnover all transcripts, documents and other pieces of information and evidence to the ICI, and it is our commitment to fully cooperate with the ICI on any and every aspect of our previous proceedings,” ayon sa pahayag ni Ridon.
Dagdag pa ni Ridon, maghahain sila ng mga panukalang batas kaugnay ng proseso ng mga proyektong pang-imprastraktura—mula sa pagpaplano at pagpapatupad hanggang sa pagsusuri.
Layunin din ng komite na palakasin ang ICI sa pamamagitan ng pagbibigay rito ng kapangyarihang maglabas ng subpoena at magpataw ng contempt.
Nagtungo si Speaker Dy sa tanggapan ng ICI upang personal na ibigay ang dokumento ng mga ebidensya ng isinagawang imbestigasyon ng Kamara para sa pagsusuri ng independent commission sa maanomalyang flood control projects na itinatag ni Pangulong Ferdinand Marcos Jr.
“We trust that through its work, the ICI will be able to ensure transparency, that it will be able to ensure accountability, and most important of all, that it will be able to ensure justice,” ayon kay Ridon.
