11,162 total views
Hinimok ni Cardinal Luis Antonio Tagle ang mga Cebuano na hanapin si Hesus sa bawat tao at sitwasyon sa kanilang pamayanan.
Sa kanyang pagninilay sa pagluklok kay Cebu Archbishop Alberto Uy sa Cebu Metropolitan Cathedral, binigyang-diin ng Pro Prefect ng Dicastery for Evangelization ng Vatican na si Hesus ay kailanman hindi nawawala, kundi laging naghihintay na matagpuan.
“Dear Archdiocese of Cebu and dear Archbishop Abet, look for Jesus. Look for Jesus always in burnt villages, in submerged towns, in the smiles of children, in the frustration of the youth, in the hopes and dreams of the afflicted, in social media, in the cry of the denuded hills and polluted waterways”, ayon kay Cardinal Tagle.
Tinukoy ng kardinal na maraming tao sa lipunan ang naghihintay na muling madama ang kanilang halaga—kabilang ang mga nakalimutan, inabandona, mga nasa piitan, at yaong mga nawalan ng pag-asa.
“Find love. Find Christ Jesus in each other. In every situation becomes the Jerusalem of mission,” dagdag pa ng kardinal.
Pinaalalahanan din ni Cardinal Tagle ang mga mananampalataya na maging pari man o obispo, lahat ay nangangailangan ring muling matagpuan sapagkat bawat isa ay kamukha ni Hesus.
Sa kanyang mensahe, hinikayat ng kardinal ang bagong pastol ng halos limang milyong Katoliko sa Cebu at ang buong pamayanang Kristiyano na ipagpatuloy ang pagbubuklod sa paglalakbay bilang isang simbahang sinodal—isang pamayanang naglalakbay nang magkakasama bilang mga peregrinong naghahanap ng landas tungo kay Hesus.
Binigyang-diin din ni Cardinal Tagle ang halimbawa ni Hesus sa paglalakbay tungo sa Jerusalem, kung saan isinakatuparan Niya ang kalooban ng Ama sa pamamagitan ng krus at pagkabuhay na muli.
“Jesus was not seeking celebrity status… He was seeking to do God’s will no matter what the cost,” ani Tagle, na nagpapaalala sa lahat na gawing huwaran si Kristo sa gitna ng mga hamon ng pagiging pastol.
Pinangunahan ni Papal Nuncio to the Philippines Archbishop Charles Brown ang seremonya ng pagluklok kay Archbishop Uy, na dinaluhan ng halos 70 obispo, mahigit 700 pari mula sa Bohol at Cebu, at libu-libong mananampalataya ng arkidiyosesis.
