29,074 total reads
Muling nanawagan si Kalookan Bishop Pablo Virgilio Cardinal David, Pangulo ng Catholic Bishops’ Conference of the Philippines (CBCP), sa mga Pilipino na manindigan para sa katotohanan, katapatan, at tapang sa gitna ng mga katiwaliang patuloy na sumisira sa tiwala ng mamamayan at sa kinabukasan ng bansa.
Ayon kay Cardinal David, sinusuportahan ng CBCP ang mas malalim na pagtutulungan ng simbahan at sambayanan sa diwa ng synodality — ang sabayang paglalakbay ng pakikinig, pagkilos, at pagtindig para sa kabutihan ng lahat.
“Hindi po tayo kumikilos dahil sa galit, kundi dahil sa pag-asa. Nananawagan po tayo ng pananagutan, pagtatanggol sa katotohanan at pagpapalakas ng ating demokrasya,” pahayag ni Cardinal David.
Binigyang-diin ng kardinal na ang katiwalian ay hindi lamang paglabag sa batas, kundi isang mabigat na kasalanang moral na sumisira sa tiwala ng taumbayan at nagpapahina sa pundasyon ng lipunan.
Hinikayat ni Cardinal David ang mga mamamayan na manindigan at papanagutin ang mga sangkot sa maling paggamit ng pondo ng bayan, ibalik ang ninakaw, at wakasan ang sistemang ginagamit ang yaman ng bayan para sa pansariling kapakinabangan.
Para naman sa mga nasasangkot at binabagabag ng konsensya, ibinahagi ng kardinal ang tatlong hakbang tungo sa tunay na pagbabalik-loob — ang pag-amin, pagsisisi, at pagsasauli o pagtutuwid.
“Kapag merong pag-amin, pagsisisi at pagsasauli ay mas madaling lumago ang tunay na pagpapatawad at pagkakasundo,” ayon kay Cardinal David.
Iginiit ng pinuno ng CBCP na dapat manatili ang mga mamamayan sa mapayapang pamamaraan at sa pagsunod sa Saligang Batas, habang aktibong nakikilahok sa demokratikong proseso ng bansa, at tumanggi sa anumang panawagan ng karahasan o hakbang na labag sa batas.
Hinimok din ni Cardinal David ang mga laiko na manguna sa misyon ng pagbabago, at ang mga lingkod-bayan at tagapagtanggol ng batas na manatiling tapat sa Konstitusyon at sa kanilang sinumpaang tungkulin.
Pinaalalahanan din ng kardinal ang sambayanang Pilipino, anuman ang relihiyon o paniniwala, na magtulungan para sa pagbuo ng lipunang naglilingkod at namamahala nang may pananagutan, sa halip na pairalin ang pribilehiyo at palakasan.
“Ang pag-asa ay hindi salita lamang, kundi sama-samang paninindigan… Sa tulong ng Diyos at sa tapang ng sambayanang Pilipino, mananaig ang liwanag kaysa kadiliman, ang katotohanan kaysa kasinungalingan, at ang pag-ibig kaysa katiwalian… Sama-sama po nating itatayo ang isang bansang marangal, makatarungan, at tunay na malaya,” saad ni Cardinal David.
