72,551 total views
Maglulunsad ang Clergy for Good Governance (CGG) ng isang natatanging pagdiriwang kasabay ng kapistahan ng Pagkahari ng Panginoong Hesukristo sa Sanlibutan o Solemnity of Christ the King, at ng ika-100 anibersaryo ng pagkakatatag ng kapistahan.
Pangungunahan ito ng National Shrine of Mary, Queen of Peace o EDSA Shrine sa November 23, 2025.
Tugon ito sa panawagan ni Kalookan Bishop Pablo Virgilio Cardinal David, Pangulo ng Catholic Bishops’ Conference of the Philippines (CBCP), kaugnay ng patuloy na katiwaliang umiiral sa lipunan.
Ayon sa CGG, layunin ng pagdiriwang na muling pagtibayin ang panawagan para sa pagpapanibago ng asal at mabuting pamamahala sa gitna ng mga usapin ng korapsyon sa pamahalaan.
“Amidst the continuing scandal of massive corruption that infects practically all levels of our government, this centennial celebration becomes a powerful summons to conscience. We will call every Filipino, especially those in public service, to restore integrity, accountability, and a sense of service to the common good under the kingship of Christ,” ayon sa CGG.
Sa pamamagitan ng social media at mga himpilan ng radyo, magkakaroon ng sabayang pagdiriwang sa mga arkidiyosesis at diyosesis sa buong bansa na makikibahagi sa mga gawain sa EDSA Shrine.
Magsisimula ang pagdiriwang sa Banal na Misa sa ganap na alas-4 ng hapon, na susundan ng prusisyon at National Holy Hour.
Pagkatapos nito’y isasagawa naman ang Fiesta ng Kabataan, tampok ang mga pagtatanghal ng makabayan at relihiyosong awitin.
Bunsod ng panawagan ni Cardinal David para sa katotohanan, katapatan, at tapang sa gitna ng katiwalian, layon ng CGG na gawing pagkakataon ang sentenaryo ng kapistahan ni Kristong Hari upang pagtibayin ang pananampalataya at paninindigan ng sambayanang Pilipino para sa isang lipunang pinamumunuan ng kabutihan, katarungan, at pananagutan.
