38,247 total views
Magsagawa ang Diyosesis ng Imus ng Diocesan Prayer Rally for Good Governance, Transparency, and Accountability.
Ito ay gaganapin sa bisperas ng Dakilang Kapistahan ng Kristong Hari, sa Sabado, Nobyembre 22, 2025, mula 3:00 PM hanggang 8:30 PM sa Dasmariñas Grandstand, Lungsod ng Dasmariñas.
Tema ng pagtitipon ay “Simbahang Kabitenyo: May Pananagutan, May Pananagutin,” bilang panawagan ng Simbahan sa paninindigan para sa katotohanan, katarungan, at moral integrity, lalo na sa harap ng lumalalang katiwalian sa lipunan.
Ayon kay Imus Bishop Reynaldo Evangelista, pansamantalang kanselado ang lahat ng Misa sa buong Diyosesis sa araw ng Nobyembre 22 upang bigyang-daan ang malawakang pakikilahok ng mga mananampalataya.
“Lahat ng Misa sa Nobyembre 22 sa mga parokya ay kanselado sa buong Diyosesis; Ang mga miyembro ng Adoracion Nocturna ay inaanyayahang dumalo sa Prayer Rally para sa kanilang Vigil; Ang pagdiriwang ngayong taon ay mahalaga dahil ito ang 100th Anniversary ng pagtatatag ng kapistahan ng Christ the King sa dokumentong “Quas Primas” ni Pope Pius XI (1925),” ayon pa sa circular.
Hinihikayat din ng obispo ang mga miyembro ng Adoracion Nocturna na dumalo bilang bahagi ng kanilang Vigil para sa Kapistahan.
Binibigyang-diin ng Diyosesis na ang pagtitipon ngayong taon ay may natatnging kahalagahan dahil ito ay ang ika-100 anibersaryo ng pagkakatatag ng Kapistahan ng Christ the King sa pamamagitan ng dokumentong Quas Primas (1925) ni Pope Pius XI, na nanawagan sa isang lipunang nakatuon sa kapayapaan, katarungan, at buhay-Ebanghelyo.
Hinihikayat ang lahat ng dadalo na magsuot ng puting damit bilang simbolo ng pagkakaisa at dalisay na hangarin.
Nilinaw naman ng Diyosesis na ang Prayer Rally ay hindi protesta, kundi pagtitipon ng Simbahan para sa paninindigan sa mabuting pamamahala at pagpapalakas ng tinig ng pananampalataya sa lipunan.
