23,294 total reads
Minsan, tinanong ko ang mga bata: “Ano ang kulay ng Adbiyento?” Violet! Sagot nila. At sabi ko, “ano ang ibig sabihin ng kulay na ito?” Nagulat ako sa tumayong bata. Sabi niya “puto-bumbong!” May nagsabi pa nga ng “Ube” sa likod. Natawa na lang ako. Pero naisip ko, kapag Adbiyento, mas nakikita natin itong kaugnay ng pasko. Pero ang adbiyento na galing sa salitang advenire o “pagdating”, ay tumutukoy sa pagdating ni Hesus sa paghuhukom sa wakas ng panahon bagaman inaalala din naman talaga natin ang unang pagdating ni Hesus noong isilang siya sa Bethlehem. Kaya nga, sa unang dalawang Linggo ng Adbiyento, ang tema ng mga pagbasa ay tungkol sa paghahanda natin sa muling pagbabalik ni Hesus habang ang huling dalawang Linggo, kasama na ang mga pagbasa sa “misa rorate” o Simbang Gabi ay patungkol na sa pagsilang ni Hesus. Hindi natin kailangang magmadali na makarating sa Pasko. Ang adbiyento, tinuturuan tayong maging matiyaga sa paghihintay, hindi nagmamadali kundi ninanamnam ang bawat sandali.
