79,650 total views
Tiniyak ng pamunuan ng Quiapo Church ang pagkakaroon muli ng pagbabago sa gagawing pagdiriwang ng Traslacion ng Nuestro Padre Jesus Nazareno para sa susunod na taon na pagdiriwang.
Ayon kay Fr. Robert Arellano, LRMS-tagapagsalita ng Traslacion 2027 ang pagbabago ay nakabase na rin sa naging karanasan ngayon pista ng Nazareno.
“We we’re going to have immediate evaluation. Sabi nga natin, sa bawat taon ito ay bagong karanasan, bawat taon tayo ay natututo. Kaya ngayon pa lamang ‘yong mga karanasan ngayon ito ay ating nire-record para maging instrumento para sa mga darating na taon ng pagdiriwang,” ayon sa pahayag ni Fr. Arellano.
Ang pahayag ay kaugnay na rin sa haba ng itinagal nang prusisyon, gayundin ang ulat na marami ang nasaktan at nasugatan. Sa kabuuan apat katao ang nasawi sa pagdiriwang-bagama’t ang pagkasawi ng photographer na si Itoh Son ay walang direktang kaugnayan sa prusisyon.
Pagkaka-antala ng prusisyon
Binanggit ng pari, na ilan sa pangunahing dahilan ng pagkakaantala ng prusisyon ay dahil sa panghaharang at pag-akyat sa andas ng mga deboto sa kabila ng una ng pagbabawal.
“Sa pagkakataong ito, despite sa panawagan ng Simbahang Katoliko at sa social media …na bawal ang pagsampa (andas) yet, may mga deboto pa rin tayo na hindi sumunod sa ating panawagan. Ito rin po ay isa sa nakahadlang sa bilis ng traslacion,” ayon kay Fr. Arellano.
Gayunman, sinabi ng pari na sa kabuuan ay wala namang naitalang krimen sa naging pagdiriwang ng Traslacion.
“Generally, we have a zero-crime rate. Wala tayong naiulat nak rime. Maaring may mga konting pagtutulakan pero ito ay normal na kapag isinagawa ang traslacion, pero ang krimen wala po tayong reported incident,” ayon pa sa pari.
Paalala ng simbahan
Samantala, ipinaalala ng Simbahang Katolika na ang biyaya ng Diyos ay hindi nasusukat sa tindi ng pisikal na sakripisyo o sa haba ng prusisyon.
Ito ang pagninilay ni Fr. Jerome Secillano ng Catholic Bishops’ Conference of the Philippines kaugnay ng Traslacion ng Nuestro Padre Jesus Nazareno 2026 na umabot sa 30-oras.
Ayon kay Fr. Secillano, mahalagang maunawaan ng mga deboto ang malinaw na pagkakaiba ng tunay na debosyon at ng panatismo, lalo na sa mga nagaganap tuwing Traslacion sa Quiapo.
Bagama’t kinilala niya ang taimtim na pananampalataya ng mga Pilipino kay Hesus Nazareno, binigyang-diin niya na kailangang samahan ito ng pag-iingat, katwiran, at kabanalan upang hindi mauwi sa labis na pagkahumaling na maaaring magdulot ng panganib.
“It’s good to see people exuding religious fervor as far devotion to Jesus the Nazarene is concerned, even if it is in a manner only they can understand, but there should be a great deal of rationality and solemnity in doing so lest it gives the devotion a semblance of religious fanaticism,” ayon kay Fr. Secillano
Dagdag pa ng pari, “This year, they showed that one’s desire can be an overwhelming force that can trump down even the most rational among us. I hope that one day all will realize that God’s generosity is not dependent on how feverishly we have expressed our faith,” ayon kay Fr. Secillano.
Sa huli, ipinaalala ni Fr. Secillano sa mga deboto na ang kabutihang-loob ng Diyos ay nasusukat sa taos-pusong pamumuhay at makataong pagsasabuhay ng pananampalataya, hindi sa tindi ng ipinapakitang debosyon.
