33,987 total views
Hinimok ni Bayombong Bishop Jose Elmer Mangalinao ang mga nagbabarikada laban sa pagmimina na iangat sa Panginoon ang kanilang patuloy na pakikibaka, kasabay ng panawagang manatiling matatag sa pagtatanggol sa buhay, lupa, at kapayapaan ng kanilang pamayanan.
Ito’y matapos pangunahan ni Bishop Mangalinao ang pagdiriwang ng Banal na Misa kasama ang mga pari, relihiyoso, at mga anti-mining defender sa Barangay Bitnong, Dupax del Norte noong January 12, 2026, sa gitna ng nagpapatuloy na pagtutol ng mga residente sa mining exploration sa lugar.
Binigyang-diin ni Bishop Mangalinao sa kanyang pagninilay ang kahalagahan ng mas pinaigting na pagbabantay sa barikada upang mapigilan ang pagpasok ng mga kawani ng Woggle Corporation–ang kumpanyang nagsasagawa ng exploration.
“Itaas po natin ang ating pagbabantay, itaas natin ang ating barikada. Itinataas natin ito sa pamamagitan ng pagtanggap natin kay Kristo. Itong ipinagtatanggol natin, isama natin si Lord—hindi po tayo nag-iisa,” ayon kay Bishop Mangalinao.
Aminado ang obispo na maaaring maging mahaba at mahirap ang proseso ng pakikipaglaban, subalit nananatili ang pag-asa na sa huli ay mananaig ang kabutihan at katarungan ng Diyos.
“Maaaring matagalan sa ating kalendaryo, pero sa Kanya, ang nararapat, ang tama, ang buhay, mangyayari at mangyayari sa Kanyang kapangyarihan,” dagdag ni Bishop Mangalinao.
Ang pagdiriwang ng Eukaristiya ay malinaw na pagpapahayag ng patuloy na suporta ng Diyosesis ng Bayombong sa mga apektadong mamamayan at ng mariing pagtutol ng Simbahan sa kasalukuyang mining exploration sa Dupax del Norte.
Nagpasalamat naman ang mga anti-mining defender sa mga religious group sapagkat ang Simbahan na lamang ang nagsisilbi nilang kanlungan at katuwang sa pagtatanggol sa kalikasan at sa kanilang karapatan.
Matatandaang noong December 10, 2025, nabigong ipatupad ang Writ of Preliminary Injunction na inilabas ng Regional Trial Court Branch 30 laban sa mga nagbabarikada sa Sitio Keon, Barangay Bitnong, dahil sa mga kakulangan sa kautusan.
Inaasahan naman ngayong Martes, January 13, na muling susubukang ipatupad ang nasabing Writ of Preliminary Injunction laban sa barikada sa lugar.
