53,024 total reads
Mariing kinondena ni Pope Leo XIV ang human trafficking at tinawag itong isang mabigat na krimen laban sa sangkatauhan.
Sa kanyang mensahe para sa ika-12 World Day of Prayer and Awareness against Human Trafficking na ginugunita ngayong February 8, muling iginiit ng Santo Papa ang matibay na paninindigan ng Simbahang Katolika na harapin at wakasan ang makabagong anyo ng pang-aalipin.
Binigyang-diin ni Pope Leo na ang tunay na kapayapaan ay nagsisimula sa pagkilala at paggalang sa dignidad na ipinagkaloob ng Diyos sa bawat tao. Subalit sa panahon ng karahasan at digmaan, ay madalas isinasantabi ang buhay ng tao kapalit ng interes na pulitikal at pang-ekonomiya.
“True peace begins with the recognition and protection of the God-given dignity of every person. Yet, in an age marked by escalating violence, many are tempted to seek peace through weapons as a condition for asserting one’s own dominion,” ayon sa mensahe ni Pope Leo.
Ayon pa sa Santo Papa, ang armadong tunggalian at kawalang-katatagan sa iba’t ibang panig ng mundo ay lumilikha ng mga pagkakataon para sa mga human trafficker na pagsamantalahan ang mga lumikas at mahihinang sektor, lalo na ang kababaihan at kabataan.
Nagbabala rin ang pinunong pastol sa pag-usbong ng tinatawag na cyber slavery, kung saan nililinlang ang mga biktima sa online schemes at itinutulak sa mga ilegal na gawain tulad ng droga at panloloko. tao.
Hinimok ni Pope Leo ang mga Kristiyano na tumugon sa pamamagitan ng panalangin at kamalayan. Aniya, ang panalangin ang nagbibigay-lakas upang labanan ang kawalang-malasakit, habang ang kamalayan ang susi sa pagbuwag sa mga sistemang mapagsamantala, kabilang na sa digital space.
Ayon pa kay Pope Leo XIV, “Let us all join the journey toward a world where peace is not merely the absence of war, but is ‘unarmed and disarming,’ rooted in full respect for the dignity of all.”
Ipinagkatiwala niya ang pagdiriwang ng World Day laban sa Human Trafficking kay Santa Josefina Bakhita, bilang sagisag ng pag-asa at paninindigan para sa isang mundong may tunay na kapayapaan at paggalang sa dangal ng bawat isa.
