42,980 total reads
Matagumpay na idinaos ang 29th National Assembly ng Association of Catholic Shrines and Pilgrimages (ACSP) sa Minor Basilica and Parish of La Purisima Concepcion sa Santa Maria, Bulacan.
Ayon kay ACSP President, Fr. Reynante Tolentino, ang pagtitipon ay nagbigay-daan sa mas malalim na dayalogo, pagbabahagi ng karanasan, at pagtutulungan ng mga Rector, Parish Priest, altar servers, at mga tagapangalaga ng dambana sa buong bansa. Layunin nito na higit na mapalakas at mapangalagaan ang mga Pilgrim Sites at dambana bilang tahanan ng Diyos at ng mga deboto.
Nagpasalamat din ang pari kay Bishop Dennis Villarrojo ng Diocese of Malolos, pati na rin sa lahat ng parokya, pari, at kawani ng simbahan na tumulong sa mga delegado ng ACSP. Binanggit ni Fr. Tolentino ang pagsisikap ng bawat miyembro ang naging susi sa matagumpay na pagpapatibay ng pananampalataya sa lokal na komunidad.
Hinimok din ng pari ang mga Pilipino na suportahan ang mga adbokasiya ng ACSP, lalo na sa pagpapabuti ng mga dambana at pagpapalaganap ng pananampalataya, bilang paghahanda sa 30th ACSP National Assembly na gaganapin sa Bohol sa 2028.
Ayon kay Fr. Tolentino, “Two years pa mula ngayon, ngunit magsasama-sama tayo ulit upang magdiwang, magbahagi ng karanasan, at patatagin ang ating pananampalataya sa Panginoong Hesukristo at debosyon sa Mahal na Birheng Maria.”
Naging tampok sa 29th ACSP National Assembly ang pagtutulungan at pagdayalogo upang mas mapalakas ang mga dambana at pilgrimages site sa Pilipinas.
