27,056 total views
Ipinagdiwang ng Catholic Bishops’ Conference of the Philippines–Episcopal Commission on Health Care (CBCP-ECHC), katuwang ang Diocese of Imus at ang Department of Health, ang pambansang pagdiriwang ng World Day of the Sick 2026 sa Lungsod ng Imus sa Cavite, kasabay ng paglulunsad ng programang Simba-Kalusugan.
Sa temang “The compassion of the Samaritan: loving by bearing another’s pain,” binigyang-diin ng pagdiriwang ang panawagan ng Simbahan sa konkretong pagmamalasakit sa mga maysakit at nasa laylayan.
Isinagawa ang gawain noong February 14, 2026, sa Diocesan Shrine and Parish of Our Lady of the Pillar o Imus Cathedral, sa pangunguna ni Imus Bishop Reynaldo Evangelista, na siya ring chairman ng CBCP-ECHC.
Iginiit ni Bishop Evangelista na ang pananampalataya at kalusugan ay hindi dapat magkahiwalay, kundi dapat magtagpo sa aktuwal na pagkilos at paglilingkod para sa kapwa.
“Worship and Health—where every person must be considered integrally and as a whole. Making health services close to people in making people, the center of services,” ayon sa CBCP-ECHC.
Isinagawa ang paglulunsad sa Simba-Kalusugan sa pakikipagtulungan ng DOH sa pamumuno ni Health Secretary Teodoro Herbosa, kasama ang iba’t ibang healthcare networks at mga ospital.
Nagkaloob ang inisyatibo ng libreng medical consultation at mga gamot, dental services, chest X-ray, laboratory tests, ECG, HIV screening, counseling, at health education kaugnay ng iba’t ibang karamdaman.
“These weren’t just medical services—they were acts of mercy, dignity restored, and hope renewed,” saad ng CBCP-ECHC.
Bagamat pambansang paglulunsad ang naganap, ang Simba-Kalusugan ay nakaugat sa umiiral na Community-Based Healthcare Programs ng Simbahan sa Luzon, Visayas, at Mindanao—mga inisyatibong napatunayang epektibo sa paghahatid ng serbisyong pangkalusugan sa mismong pamayanan.
Tiniyak naman ng CBCP-ECHC na ipagpapatuloy at palalawakin pa ang Simba-Kalusugan sa iba’t ibang diyosesis, upang higit na mapalapit ang pangangalagang pangkalusugan sa mga higit na nangangailangan.
“The success stories from the different dioceses are inspiring making healthcare initiatives and services closer to the community, each adapting the program to their local communities’ unique needs,” ayon sa CBCP-ECHC.
