33,577 total views
Mariing iginiit ni Lipa Archbishop Archbishop Gilbert Garcera na hindi maaaring manatiling neutral ang Simbahan sa panahong nilalapastangan ang dignidad ng tao.
Ito ang mensahe ng arsobispo at kasalukuyang pangulo ng Catholic Bishops’ Conference of the Philippines sa nalalapit na paggunita sa ika-40 anibersaryo ng People Power Revolution sa EDSA Shrine sa February 25.
Sa kanyang pagninilay sa ikaapat na araw ng misa nobenaryo sa National Shrine of Our Lady of Peace o EDSA Shrine, binigyang-diin ng arsobispo na ang pananahimik sa harap ng kawalang-katarungan ay hindi kabanalan kundi pakikipagsabwatan.
“The Church cannot be neutral when human dignity is trampled. Silence in the face of injustice is not holiness; it is complicity. EDSA at 40 is not just a commemoration; it is an examination of conscience,” ayon kay Archbishop Garcera.
Ayon kay Archbishop Garcera na ang paggunita sa EDSA ay hindi lamang isang pag-alala sa mahalagang yugto ng kasaysayan, kundi isang pagsusuri ng budhi ng mga Pilipino.
Binalikan din ng arsobispo ang diwa ng 1986 kung saan nanaig ang paninindigan ng konsensya laban sa takot at karahasan.
Sinabi ni Archbishop Garcera na ang tunay na lakas ng EDSA ay hindi lamang nagmula sa lakas ng tao kundi sa pananalig na pinatatag ng panalangin.
“This was not the absence of fear—it was the triumph of conscience over fear. EDSA was not simply people power; it was people power sustained by prayer,” ayon sa arsobispo.
Gayunman, nagbabala ang arsobispo sa kasalukuyang banta ng pagbaluktot sa kasaysayan at paghina ng moral na paninindigan ng lipunan.
“The greatest danger today is not only historical distortion, but moral fatigue,” giit ni Archbishop Garcera.
Hinimok ng opisyal ang mga mananampalataya na hindi maging kampante sa tinamong kalayaan kundi patuloy na manindigan sa pamamagitan ng aktibong pagtatanggol sa katotohanan at katarungan.
Giit ng arsobispo, patuloy ang panawagan ng Diyos sa bawat henerasyon na piliin ang buhay na may dignidad at dangal.
“Freedom has a cost. Peace has a price. Faith demands responsibility,” aniya.
Muling ipinagkatiwala ni Archbishop Garcera ang Pilipinas sa makainang pagkalinga ng Mahal na Birheng Maria, na kinikilala bilang Ina ng Kapayapaan at gumabay sa sambayanan 1986 EDSA People Power Revolution.
Ang ika-40 anibersaryo ng EDSA, ayon sa arsobispo, ay nananatiling paanyaya sa bawat Pilipino na piliin ang pananampalatayang may tapang, kalayaang may pananagutan, at kapayapaang nakaugat sa katarungan.
Kasama ng arsobispo sa pagdiriwang ng banal na misa ang mga paring naglilingkod sa CBCP at si shrine rector Fr. Jerome Secillano.
