497 total views
Nanawagan ang Catholic Bishops’ Conference of the Philippines (CBCP) sa lahat ng diyosesis at mananampalataya na makiisa sa muling pagtatalaga sa Divine Mercy sa buong bansa bilang tugon sa kasalukuyang mga hamon at kawalang-katiyakan sa mundo.
Sa sirkular ng kalipunan sa pamumuno ni Lipa Archbishop Gilbert Garcera bilang pangulo, inaprubahan ng Permanent Council ng CBCP ang renewal of the Consecration to the Divine Mercy na isasagawa sa Divine Mercy Sunday, sa Abril 12, 2026.
Binigyang-diin sa pahayag na ang hakbang ay isang malinaw na tanda ng pagtitiwala sa Diyos sa gitna ng krisis.
“In the face of our current national and global crises, this renewal of consecration would be a beautiful and fitting response of hope in the Lord’s Mercy.”
Ayon sa CBCP, ang sabayang pagtatalaga sa buong bansa ay magsisilbing makapangyarihang pagpapahayag ng pananampalataya, lalo na sa panahong maraming Pilipino ang dumaranas ng pangamba at pagsubok.
“This nationwide consecration will be a profound expression of our trust in the Divine Mercy—a trust that remains our final refuge in these times of uncertainty and trial.”
Iginiit din ng mga obispo na ang pagtitiwala sa awa ng Diyos ang tanging sandigan ng kaligtasan ng sangkatauhan.
“It is only by trusting in Divine Mercy that we can hope to be saved.”
Kaugnay nito, itinakda ng CBCP na ang panalangin ng Consecration to the Divine Mercy ay bigkasin sa lahat ng misa sa araw ng pagdiriwang, kapalit ng General Intercessions.
Hinikayat din ang lahat ng parokya, religious communities, at Catholic institutions na aktibong makilahok sa inisyatibo.
Inaanyayahan ng CBCP ang buong sambayanan na magkaisa sa panalangin at lubos na magtiwala sa Diyos at hinimok ang mga mananampalataya na sabayang ipahayag ang pananalig kay Hesus na muling nabuhay.
