702 total reads
Ibinahagi ni Malolos Bishop Dennis Villarojo na ang kawanggawa ay kusang nagbabalik bilang biyaya ng Diyos.
Ito ang mensahe ng obispo sa pagdiriwang ng ika-40 anibersaryo ng Bethany House of Sto. Niño Orphanage sa Guiguinto,Bulacan na isang tahanan na patuloy na kumakalinga sa mga batang nangangailangan ng aruga.
“Ang kawanggawa has a way of going back to us… because that’s the way grace goes,” ayon kay Bishop Villarojo.
Binigyang-diin ni Bishop Villarojo na ang pagpapadama ng pag-ibig sa kapwa ay gawaing kinalulugdan ng Diyos.
“Love is repaid by love… anuman ang pag-ibig na ginagawa natin sa kapwa, ito ay babalik sa atin bilang pag-ibig,” dagdag ng obispo.
Ayon naman kay Sr. Emeliana Bantigue, OP, executive directress ng institusyon, higit sa pisikal na pangangailangan ang dapat ibigay sa mga bata, lalo na sa mga murang edad na maituturing na formative years ng isang bata.
“Hindi lang pakainin at patirahin; kailangan ng bata ang pamilya… dahil ito ang bubuo sa kanyang pagkatao,” pahayag ni Sr. Bantigue sa Radyo Veritas.
Ibinahagi ng madre na makalipas ang apat na dekadang paglilingkod ng institusyon, mahigit isang daang bata na ang naipa ampon sa iba’t ibang bahagi ng mundo, partikular sa Amerika at Europa, bilang bahagi ng patuloy na misyon ng institusyon.
Sa kasalukuyan, may 22 batang inaaruga ang Bethany House, kung saan ang pinakabata ay isang pitong buwang gulang na sanggol, patunay na nagpapatuloy ang pangangailangan sa kalinga at proteksyon para sa mga musmos.
Itinatag ang institusyon noong March 30, 1986 ng yumaong obispo ng Malolos na si Bishop Cirilo Almario, na nagsimula sa walong batang ulila at inabandona ang inaaruga, at ipinagkatiwala sa pangangalaga ng Dominican Sisters of St. Joseph bilang isang child-caring institution ng diyosesis.
Layunin nitong magsilbing pansamantalang tahanan at kanlungan ng mga batang inabandona at pinabayaan sa mga lansangan, gayundin ng mga batang nagmula sa maralitang pamilya, kung saan bukod sa pangangailangang pisikal ay tinutugunan din ang kanilang sosyal, intelektwal at espiritwal na paghubog.
Mula sa simpleng pagkalinga, lumawak ang misyon ng Bethany House sa pagbibigay ng pangmatagalang solusyon sa pamamagitan ng adoption program na sinimulan noong 1999, upang matiyak na magkakaroon ng sariling pamilya ang mga bata.
Binigyang-diin din ni Sr. Bantigue na ang suporta sa Bethany House ay hindi lamang nananatili sa isang henerasyon, kaya’t lubos ang kanyang pasasalamat sa lahat ng mga donors at benefactors nito.
“Ang pagtulong ay naipapasa na rin sa susunod na henerasyon,” ani ng madre.
Hinimok ng madre ang publiko na makibahagi sa misyon ng institusyon at iginiit na ang pagbibigay ng pag-ibig at kalinga sa mga bata ay hindi lamang pagtugon sa kanilang pangangailangan kundi pakikibahagi sa patuloy na pagdaloy ng biyaya ng Diyos.
