10,999 total reads
Nanawagan si Iba, Zambales Bishop Bartolome Santos sa mga pari na isabuhay ang “accompaniment” o tunay na pagsama sa kanilang paglilingkod, sa kanyang pagninilay sa ginanap na Chrism Mass sa Saint Augustine Cathedral Parish noong Martes Santo.
Ayon kay Bishop Santos, ang pagiging sinodal na pari ay nangangahulugang handang samahan ang bayan ng Diyos sa lahat ng pagkakataon—lalo na sa gitna ng hirap, pagdurusa, at pagkakasala.
Iginiit ng obispo na ang pagsama ay hindi lamang simpleng presensya, kundi pakikibahagi sa pinagdaraanan ng kapwa.
“Sapagkat noon pa man ay sinodal na ang Diyos-sumasama. Napakahalaga pong bahagi ng sinodality ang accompaniment… Bakit? Sapagkat ang Diyos, He accompanied His people since the beginning until the present time. Hindi niya po iniwanan ang kanyang bayan,” pahayag ni Bishop Santos.
Binigyang-diin ni Bishop Santos na tulad ni Hesus, ang pari ay tinatawagan na lumapit sa mga nasa laylayan—mga makasalanan, may sakit, at mga itinatakwil—at hindi matakot lumusong sa putikan upang iahon ang mga nangangailangan.
Paliwanag pa niya, ang ganitong uri ng pagsama ay maaaring maging mahirap, masakit, at nakakapagod, ngunit ito ang tunay na anyo ng pagmamahal at paglilingkod na inaasahan sa mga lingkod ng Simbahan.
Dagdag pa niya, ang biyaya ng langis na tinanggap sa ordinasyon ay paalala ng tungkulin ng mga pari na maglingkod sa mga nangangailangan.
“Ang mga may sakit, ang mga nangungulila, ang mga nahihirapan, ang mga nawawalan ng pag-asa, ang mga nalalayo na sa Diyos ay samahan nila… Let us walk together. Let us go with each other. Walang iiwanan. ‘Yun na nga ang bukambibig ng synodality—nobody will be left behind,” giit ni Bishop Santos.
Sa huli, hinimok ni Bishop Santos ang mga mananampalataya na ipanalangin ang mga obispo, pari, relihiyoso’t relihiyosa, at mga layko na nag-alay ng buhay sa paglilingkod sa Simbahan.
“Kung ang mga pari ay pagmamahal ng Diyos sa inyo, kayo din ay pag-ibig ng Diyos sa amin. Sama-sama po tayong maglakbay—umahon, umakyat, pumaroon—at sumamba sa Diyos na maawain at mapagmahal,” ayon kay Bishop Santos.
