608 total views
Batid ni Manila Archbishop Jose Cardinal Advincula ang lumalalim na hamon sa kalusugang pangkaisipan ng mga pari sa bansa.
Sa pagdiriwang ng Chrism Mass sa Manila Cathedral, kinilala ng kardinal ang mga pag-aaral hinggil sa kalagayang pangkalusugan ng mga pari at binigyang diin na hindi ito dapat na ipagwalang bahala.
“about 18% reported that they are psychologically distressed… almost one in every five priests is undergoing a mental difficulty or emotional burden. This is a concern we cannot ignore anymore and we have to face it to resolve it,” bahagi ng pagninilay ni Cardinal Advincula.
Ibinahagi rin nito na maraming pari ang nakararanas ng depresyon, pagkabalisa, pag-iisa, at matinding pagkapagod sa ministeryo.
Sa kanyang pagninilay, hinimok ng Kardinal ang kaparian na harapin ang kanilang pinagdaraanan at huwag itago ang nararamdaman.
“The danger is not that we grow tired but that we refuse to recognize it… what is not offered to God cannot be healed,” paliwanag ni Cardinal Advincula.
Binigyang-diin din ng pastol na mahalaga ang ugnayan at pakikipagkapwa sa kapwa pari upang malampasan ang mga pagsubok.
“In the priesthood, isolation can drain us, but communion will sustain us and heal us,” aniya.
Kasabay nito, pinaalalahanan ng Kardinal ang kaparian na hindi nakabatay sa gawain ang kanilang pagkakakilanlan kundi sa kanilang bokasyon bilang mga lingkod ng Diyos.
Hiniling ni Cardinal Advincula ang panalangin ng mananampalataya para sa kaparian.
“Umaasa kami sa mga panalangin ninyo upang mapabuti kaming mga pari ninyo habang kami ay naglilingkod sa inyo,” panawagan ng arsobispo sa mga mananampalataya.
Kasama ni Cardinal Advincula sa pagdiriwang sina Papal Nuncio to the Philipines Archbishop Charles Brown, Archbishop Emeritus Cardinal Gaudencio Rosales, at mga pari ng arkidiyosesis.
Kinilalala sa pagdiriwang ang mga jubilarian priests ng arkidiyosesis kabilang na si Cardinal Advincula sa kanyang ika – 50 anibersaryo ng pagkapari, ika – 25 anibersaryo ng pagiging obispo.
Kinilala rin si Cardinal Rosales sa kanyang mahigit anim na dekadang ministeryo at pagiging pastol ng simbahan.
