7,018 total reads
Nagpahayag ng dalamhati at panawagan sa kapayapaan si San Carlos Bishop Gerardo Alminaza kasunod ng naganap na engkwentro sa Toboso, Negros Occidental sa pagitan ng pwersa ng pamahalaan at mga kasapi ng New People’s Army.
Sa isinapublikong pastoral pahayag ng Obispo na pinamagatang “Blessed Are the Peacemakers” (Mt 5:9) ay inihayag ni Bishop Alminaza ang pakikiramay sa lahat ng nasawi sa magkabilang panig.
Ipinaliwanag ng Obispo na ang bawat kamatayan maging anuman ang panig o partidong kinabibilangan ay maituturing na sugat hindi lamang para sa pamilyang naiwan kundi maging sa Simbahan.
“With hearts weighed down by sorrow, we receive the news of the armed encounter between the government security forces and members of the New People’s Army in Toboso, where lives were taken, and many families have been plunged into grief. We mourn all who have died, regardless of political affiliation. For every life lost is a child of God, known and loved by Him. Every death wounds not only a family, but the whole Body of Christ.” Bahagi ng pahayag ni Bishop Alminaza.
Inilarawan din ng Obispo na siya ring pangulo ng Caritas Philippines ang insidente bilang isang ‘cry of lament’, kung saan tinukoy ang mga buhay na nawala, pagdurusa ng mga naulila, takot at kawalang-katiyakan na bumabalot sa mga komunidad.
Iginiit din ni Bishop Alminaza na hindi dapat maging normal ang karahasan at hindi rin dapat na hayaan na mamayani ang pagsasawalang bahala sa buhay ng kapwa.
“We cannot accept this as normal. We cannot allow ourselves to grow indifferent to the taking of human life,” Dagdag pa ni Bishop Alminaza.
Ayon sa Obispo, ang karahasan ay bunga ng mas malalalim na suliranin tulad ng kahirapan, kawalan ng katarungan, at pagkasira ng tiwala sa mga institusyon ng pamahalaan.
Paliwanag ni Bishop Alminaza hindi lamang ang putok ng baril o mga armas ang nadidinig ng Simbahan kundi maging ang mga hinaing ng mamamayan.
“Violence does not arise in a vacuum. It takes root where wounds have long been left unattended—where poverty persists, where injustice is endured, where trust between people and institutions has been broken, and where hope in peaceful change has slowly faded. As Church, we are called to listen—not only to the sound of gunfire, but to the deeper cries of pain, frustration, and longing that lie beneath it.” Ayon pa kay Bishop Alminaza.
Muli ring iginiit ni Bishop Alminaza ang paninindigan ng Simbahan na ang karahasan ay hindi magdudulot ng pangmatagalang kapayapaan, sa halip ay mas dapat na tahakin ang landas ng tunay na kapayapaan na nakaugat sa katarungan at dignidad ng tao.
Nanawagan din ang Obispo sa iba’t ibang sektor ng lipunan kabilang ang mga armadong grupo, pamahalaan, at mga lokal na lider na piliin ang diyalogo sa halip na dahas at tugunan ang mga ugat ng tunggalian para sa kapakanan ng mas nakaraaraming mamamayan.
Hinimok din ni Bishop Alminaza ang mga komunidad na huwag panghinaan ng loob at manatiling instrumento ng kapayapaan sa kanilang mga tahanan at pamayanan.
Tiniyak din ng Obispo na patuloy na sasamahan ng Simbahan ang mga biktima ng karahasan at magsusulong ng katarungan at pagkakasundo.
“As your shepherd, I assure you: The Church does not stand apart from your suffering. We walk with you,” Dagdag pa ni Bishop Alminaza.
Samantala, nanawagan din ang Obispo ng panalangin para sa mga nasawi, sugatan, at mga pamilyang nagdadalamhati, at hiniling ang pamamagitan ng Mahal na Inang Maria bilang Reyna ng Kapayapaan para sa patuloy na kapayapaan at kaayusan ng lalawigan ng Negros.
