3,615 total reads
Naghahanda na ang simbahan para sa Season of Creation 2026 bilang taunang ekumenikal na pagdiriwang ng panalangin at sama-samang pagkilos para sa pangangalaga ng sangnilikha.
Ipagdiriwang ito mula September 1, World Day of Prayer for the Care of Creation, hanggang October 4, Kapistahan ni San Francisco ng Assisi.
Tema ngayong taon ang “Living Water,” na hango sa pahayag ni Ezekiel na naglalarawan ng umaagos na tubig mula sa santuwaryo ng Diyos bilang tanda ng paghilom at panibagong buhay para sa kalikasan at tao.
Ayon sa Laudato Si’ Movement (LSM), ang tema ay paalala ng pag-asa at pananampalataya na ang paghilom ng sangnilikha ay nagmumula sa Diyos, at inaanyayahan ang mga mananampalataya na hayaang umagos din ang buhay na tubig mula sa kanilang mga puso sa pamamagitan ng malasakit at pagkilos para sa kalikasan.
“Ezekiel’s vision is ultimately one of hope – stepping into the river reminds us of baptism. As believers, we are promised that if we receive and accept the water from the Temple – that is, God’s healing – then ‘rivers of living water’ will also flow from our hearts. As we are healed and renewed – living water will also flow from us for the healing of others and creation,” paliwanag ng LSM.
Tampok din ang simbolo ng “Immersion in Living Water” na kumakatawan sa malalim na pagpasok sa panalangin at pagninilay, gamit ang larawan ng ilog, dagat, lawa, at binyagan bilang paanyaya sa mas malalim na pananampalataya at pagbabago ng kalooban at gawi upang mas mapangalagaan ang kalikasan.
Kasabay nito, hinihikayat ang mga parokya at komunidad na maging espasyo ng panalangin, edukasyon, at konkretong pagkilos para sa mas makatarungan at mas buhay na kalikasan, lalo na para sa mga sektor na pinakaapektado ng pagkasira ng kapaligiran.
Ayon sa LSM, ang Season of Creation ay panawagan ng pagkakaisa ng mga Kristiyano at taong may mabuting kalooban upang maging bahagi ng “ilog ng pagbabago” na magdadala ng paghilom sa daigdig at pag-asa para sa hinaharap.
“As we overcome our fear and step into the water of God’s love – may we become part of the River of Transformation for the world, to see the literal healing and renewal of creation and the blessing of the Earth,” ayon sa LSM.
