10,998 total reads
Inilaan ng Kanyang Kabanalan Pope Leo XIV ang kanyang prayer intention ngayong buwan ng Mayo para sa pagkakaroon ng sapat at dekalidad na pagkain para sa lahat.
Layunin ng Santo Papa na ipanalangin ang sama-samang pananagutan ng bawat isa, mula sa mga producer hanggang sa mga mamimili upang maiwasan ang pag-aaksaya ng pagkain at matiyak na lahat ay mayroon sapat na nutrisyon.
Binigyang-diin din ni Pope Leo XIV ang kahalagahan ng malasakit at responsableng paggamit ng mga biyaya ng kalikasan, lalo na sa harap ng patuloy na suliranin ng kagutuman sa iba’t ibang bahagi ng mundo.
“Let us pray that everyone, from large producers to small consumers, be committed to avoid wasting food, and to ensure that everyone has access to quality food,” panalangin ng Santo Papa para sa buwan ng Mayo.
Muli ring ipinapaalala ng Santo Papa na ang pagkain ay hindi lamang isang pangangailangan kundi isang biyayang dapat pahalagahan at ibahagi, lalo na sa mga higit na nangangailangan.
Hinihikayat din ni Pope Leo XIV ang mga mananampalataya na maging bahagi ng solusyon sa pamamagitan ng responsableng pagkonsumo, pag-iwas sa pag-aaksaya, at aktibong pakikiisa sa mga programang tumutugon sa kagutuman.
Una nang binigyang-diin ng Santo Papa na ang pagkakaisa ng komunidad ay mahalaga upang matugunan ang mga hamon ng lipunan, kabilang ang kawalan ng sapat na pagkain.
Bahagi rin ng panawagan ng Santo Papa ang pagpapaalala na ang Simbahan ay patuloy na kumikilos upang isulong ang katarungan at malasakit, lalo na para sa mga mahihirap at nagugutom.
