12,723 total reads
Ang Mabuting Balita, 09 Mayo 2026 – Juan 15: 18-21
“SUPER MANANG/MANONG”
Noong panahong iyon, sinabi ni Jesus sa kanyang mga alagad: “Kung napopoot sa inyo ang sanlibutan, dapat ninyong malamang napoot na ito sa akin bago sa inyo. Kung kayo nga’y sa sanlibutan, iibigin kayo nito bilang kanya. Ngunit yamang hindi kayo sa sanlibutan, kundi pinili ko kayo mula rito, ito’y napopoot sa inyo. Alalahanin ninyo ang sinabi ko sa inyo: walang aliping higit kaysa kanyang panginoon. Kung ako’y inusig nila, uusigin din nila kayo; kung tinupad nila ang aking salita, tutuparin din nila ang salita ninyo. Ngunit ang lahat ng ito’y gagawin nila sa inyo dahil sa akin, sapagkat hindi nila nakikilala ang nagsugo sa akin.”
————
Minsan, nakararanas tayo ng iba’t ibang uri ng pag-uusig kapag pinaninindigan natin ang mga pagpapahalagang Kristiyano sa gitna ng magkakasalungat na interes, lalo na sa loob ng pamilya at sa ating mga kaibigan. Kahit sa lugar ng trabaho, kapag ibinabahagi natin kung paano binago ng Diyos ang ating buhay, maaari tayong bansagan ng mga katawagang tulad ng “SUPER MANANG/MANONG” at iba pa. Sana, ang mga karanasang ito ay hindi magpahina sa ating pasya na manatiling tapat at masigasig na tagasunod ni Kristo.
Dapat din nating alalahanin na ang pag-uusig na nararanasan ng mga Kristiyano ngayon ay tila isang “patak lamang sa timba” kung ihahambing sa dinanas ng mga unang Kristiyano. Sila ang nagdala ng “hirap ng panganganak” ng Simbahan. Ngunit sa kabila ng matinding pagdurusa, sa tulong ng Espiritu Santo, nagawa nilang magtiyaga at magpatuloy.
Sa tuwing dumaraan tayo sa mga ganitong karanasan, alalahanin nating ang mundo ay unang napoot kay Jesus. Kung tayo man ay kapootan dahil tayo ay kanyang tapat na tagasunod, tunay tayong pinagpala, sapagkat tayo ay nasa tamang landas patungo sa buhay na walang hanggan.
Panginoong Jesus, salamat po at pinili mo kami mula sa sanlibutan!
