14,360 total views
Iginiit ni Akbayan Partylist Rep. Percival Cendaña na posibleng may pananagutan si Senator Robin Padilla sa ilalim ng International Criminal Court Rome Statute dahil sa sinasabing pagtulong kay Senator Ronald dela Rosa upang makaalis sa Senado habang kinakaharap ang usapin sa ICC warrant.
Ayon kay Cendaña, taliwas ang naging pahayag ni Padilla matapos nitong amining sumabay sa kanyang sasakyan si dela Rosa nang umalis ito sa Senado noong nakaraang linggo.
“Ang nakakatawa dito, paano masasabi ni Sen. Robin na hindi niya itinakas si Sen. Bato, e inamin niya na siya ang nag-udyok na umalis ito sa Senado at sa kaniya rin ang getaway vehicle,” ayon sa mambabatas.
Sinabi ng kongresista na maaaring pumasok sa paglabag sa Article 70 ng Rome Statute o “Offenses against the Administration of Justice” ang naging hakbang ni Padilla dahil sa paghadlang sa pagpapatupad ng warrant ng ICC.
Nanawagan din si Cendaña sa mga awtoridad na imbestigahan ang senador sa posibleng paglabag sa obstruction of justice law o Presidential Decree 1829, na nagpaparusa sa mga tumutulong upang maiwasan ang pag-aresto sa isang tao.
Ang panawagan ay kasunod ito ng naging pahayag ng Department of Justice na valid ang warrant of arrest na inilabas ng ICC.
Muli ring nanawagan ang mambabatas ng nationwide manhunt laban kay dela Rosa at iginiit na hindi dapat maging kanlungan ng mga pugante at mga inaakusahan ng paglabag sa karapatang pantao ang bansa.
“Isang kahihiyan ang pagkakanlong ng ilang Senador para sa isang pumatay ng libu-libo. ‘Wag sanang madagdagan pa itong nakakahiyang pagsasalaula sa katarungan at karapatang pantao. If the government is serious in capturing this fugitive then a nationwide manhunt is absolutely necessary,” giit pa ni Cendaña.
