5,084 total views
Nanawagan para sa mas ligtas, makatao, at mahigpit na pamamahala sa basura ang Interfacing Development Interventions for Sustainability (IDIS) kasunod ng panibagong insidente ng pagguho ng sanitary landfill sa bansa.
Sa pahayag ng IDIS, labis nitong ikinalungkot ang nangyaring trahedya sa Davao City Sanitary Landfill sa Barangay New Carmen, Davao City noong May 20, 2026 na nagresulta sa pagkasawi, pagkasugat, at pagkawala ng ilang indibidwal.
Nagpahayag din ng pakikiramay ang grupo sa mga pamilya at komunidad na naapektuhan, habang patuloy ang paghahanap sa ilang nawawala.
“The tragedy reflects the challenges of increasing volume of waste generated and disposed of in our landfills everyday,” pahayag ng IDIS.
Binigyang-diin din ng IDIS na ang insidente ay dapat magsilbing babala sa pangangailangan ng mas sistematikong solid waste management na inuuna ang kaligtasan at pangangalaga sa kapaligiran.
Ipinunto rin ng grupo ang kalagayan ng mga waste picker at informal workers na kadalasang nagtatrabaho sa mapanganib na kondisyon at nangangailangan ng mas maayos na proteksyon at suporta mula sa lipunan.
“Beyond being an environmental issue, waste management is also a matter of public safety, human dignity, and social justice,” giit ng IDIS.
Ang IDIS ay isang Davao-based environmental advocacy organization na nakatuon sa sustainable development at pangangalaga ng watershed at urban environment.
Ang Davao City Sanitary Landfill ang ikaapat na landfill facility sa bansa na naiulat na nagkaroon ng insidente kaugnay ng operasyon nito ngayong taon, kasunod ng mga naunang trahedya sa Binaliw landfill sa Cebu noong Enero, Rizal Provincial Sanitary Landfill sa Rodriguez, Rizal noong Pebrero, at Navotas Sanitary Landfill sa Navotas City noong Abril.
