221 total views
Nagpahayag ng pagkadismaya ang Dapat Isa Lang o D1L Movement sa inaprubahang House Bill 8389 o ang panukalang Anti-Political Dynasty Act ng Kamara, na ayon sa grupo ay isang “watered-down” o mahinang bersyon ng tunay na reporma laban sa political dynasty.
Ayon kay D1L Movement Spokesperson Atty. Carlo Africa, hindi sapat ang nilalaman ng panukalang batas upang tuluyang mabuwag ang sistemang political dynasty sa bansa.
“We cannot help but wonder if this watered-down bill is sufficient enough to genuinely dismantle dynasties.” Bahagi ng pahayag ni Atty. Africa.
Ipinaliwanag ng grupo na nililimitahan lamang ng House bill ang pagbabawal hanggang second degree of consanguinity and affinity, samantalang isinusulong ng D1L Movement ang mas mahigpit na pagbabawal hanggang fourth degree of consanguinity and affinity.
“The House anti-dynasty bill not only fails to prohibit political dynasties. In fact, it is so weak that it legitimizes these dynasties.” Dagdag pa ni Atty. Africa.
Sa ilalim ng panukalang isinusulong ng D1L sa pamamagitan ng People’s Initiative, isang miyembro lamang ng pamilya ang maaaring humawak ng pambansa at lokal na posisyon, may one-term cooling-off period, at ipinagbabawal ang succession at pagpapalitan ng pwesto sa loob ng pamilya.
Naniniwala rin ang grupo na hindi maipapasa ng Kongresong dominado umano ng political dynasties ang isang tunay na anti-political dynasty law kaya’t hinihikayat nila ang mamamayan na suportahan ang People’s Initiative para maipasa ang “people’s version” ng naturang batas.
“Our version of the Anti-Political Dynasty Bill has resonated with ordinary citizens like us who are tired of the culture of corruption and impunity political dynasties have enabled and benefitted from.” Ayon pa kay Atty. Africa.
Binigyang-diin ng kilusan na layunin nitong tugunan ang matagal nang panawagan para sa reporma at pananagutan sa pamahalaan.
Dagdag pa ng Dapat Isa Lang o D1L Movement, layunin nitong tiyakin ang pantay na pagkakataon ng bawat mamamayan na makapagsilbi sa pamahalaan.
