398 total views
Nakiisa ang Church People Workers Solidarity o CWS sa panawagan ng Kilusang Mayo Uno sa pamahalaan na higit pang paigtingin ang pagsusulong ng occupational safety and health ng mga manggagawa.
Ang panawagan ay kasunod ng aksidente sa construction Site sa Balibago Angeles City Pampanga kung saan 40-construction workers ang natabunan ng gumuhong construction site.
Kinundena ng KMU ang patuloy na pagpapabaya ng administrasyong Marcos sa kaligtasan ng mga manggagawa gayundin ang mga construction company.
“Mariing kinukundena ng Kilusang Mayo Uno ang patuloy na pagpapabaya ng rehimeng Marcos sa karapatan ng mga manggagawa sa ligtas na lugar-paggawa. Hindi simpleng “aksidente” ang ganitong trahedya kundi resulta ng kawalan ng sapat na safety measures, mahinang pagpapatupad ng occupational safety and health standards, at prayoridad sa tubo kaysa buhay ng manggagawa. Habang kumikita ang malalaking contractor at developer, mga manggagawa naman ang inilalagay sa matinding panganib,” ayon sa mensahe ng Kilusang Mayo Uno.
Iginiit ng grupo na napapanahon nang unahin ng pamahalaan ang kapakanan ng mga manggagawa sa halip na kita.
Umaapela naman ang CWS at KMU sa pamahalaan na gawin ang lahat upang mailigtas ang mga natabunang manggagawa.
Hiniling din ng CWS sa gobyerno na panagutin sa batas ang mga pabayang contractor at developer ng gumuhong gusali.
Una ng umapela si Pope Francis noong nabubuhay pa sa mga employers na tiyakin ligtas ang mga lugar ng paggawa upang isulong ang pangangalaga sa kaligtasan at kapakanan ng mga manggagawa.
