6,667 total reads
Nag-ambagan ang mga Pari ng Diocese of Pasig para sa ipapadalang cash aid sa Diocese of Marbel Social Action Center na pansamantalang tulong pinansiyal sa mga biktima ng 7.8 na magnitude na lindol noong ika-8 (lunes) ng Hunyo 2026.
Sinabi ni Diocese of Pasig Bishop Mylo Vergara na ang nakalap na 200-libong pisong cash ay pakikiisa ng mga pari sa libu-libong residente na naapektuhan ng malakas na lindol.
“Simula noong nangyari yan, talagang nandoon yung pakikidalamhati natin sa mga biktima ng sakuna, at alam po natin na talagang hindi inaasahan ang pagdating ng lindol ay talagang bigla-bigla, sa Diyosesis po ng Pasig, dito sa kaganapang ito, agad-agad yung mga Pari po sa aming pag-aambag maglalabas na po kami ng immediately para sa relief ng mga 200-thousand na ipapadala natin sa Social Action Account ng Diocese ng Marbel,” ayon sa panayam ng Radyo Veritas kay Bishop Vergara
Inihayag ng Obispo na tatalima din ang Diocese of Pasig sa kautusan ng Catholic Bishops Conference of the Philippines (CBCP) na magsagawa ng 2nd collection sa lahat ng misa ng mga parokya sa Diyosesis upang ilaan na tulong sa earthquake victims.
“Ikalawa po, nagbigay na po ng mensahe po at directive ang ating CBCP-President Archbishop Gilbert Garcera na itong darating na linggo (June 14) na kung pwede ay magkaroon ng 2nd collection ang ating mga parokya, at yan po ay ginawa ko na pong direktba ngayon-ngayong lang para makatulong po sa Diyosesis ng Marbel at iba pang mga nasalanta ng naganap na trahedya na lindol,” ayon pa sa panayam ng Radyo Veritas kay Bishop Vergara.
Patuloy din ang pagiging aktibo ng iba pang ahensya ng simbahan upang kagyat na maipadala ang tulong sa mga biktima ng lindol.
