8,102 total reads
Muling nanawagan ng tulong ang Caritas Manila sa publiko para sa mga biktima ng magnitude 7.8 na lindol sa Sarangani at iba pang apektadong lugar sa Mindanao.
Ayon kay Caritas Manila Financial Stewardship Head Rye Zotomayor, layunin ng panibagong apela na mapalawak pa ang paghahatid ng ayuda sa mga komunidad na matinding naapektuhan ng pagyanig.
“Tayo po ay muling nag-a-appeal sa mga tagapakinig sa RAdyo Veritas, sa lahat ng mga regular supporter at donor ng Caritas Manila na tulungan natin ‘yung mga naging biktima ng Mindanao earthquake,” ayon kay Zotomayor.
Una na ring nakapagpadala ang Caritas Manila ng 500 libong piso na paunang tulong sa Social Action Center ng Diocese ng Marbel para sa mga nasalanta.
Gayunman, sinabi ng Caritas na marami pang lugar at pangangailangan ang dapat tugunan, lalo na’t maraming imprastraktura ang nasira kabilang ang mga simbahan, kapilya, at iba pang institusyon ng simbahan.
Para sa mga nais tumulong, nakalatag ang mga donation packages tulad ng 500 pesos para sa medical kit, 1,000 pesos para sa food packs na may bigas, delata, monggo, noodles at oatmeal, at 1,000 pesos din para sa hygiene kit.
Naglalaan din ang Caritas Manila ng 2 milyong piso para sa pagtatayo ng 3-in-1 multipurpose chapel na magsisilbing simbahan, evacuation center, at lugar ng pagtitipon.
Kasabay nito, nagbabala ang Caritas Manila laban sa mga nananamantala sa sakuna sa pamamagitan ng panloloko, at hinikayat ang publiko na magbigay lamang sa opisyal na channels ng organisasyon.
Pinayuhan din ang mga donor na i-verify ang impormasyon sa official website at social media pages ng Caritas Manila upang matiyak ang lehitimong donation accounts at QR codes.
“Doon po lamang tayo magtiwala sa official pages and other social media ng Caritas Manila o kaya ay tumawag, i-visit ang website CaritasManila.org.ph at nanduon ang mga contact details at maari rin ditong i-verify kung tama ang QR code, kung tama ba ang mga account number,” ayon pa sa pahayag ni Zotomayor.
