308 total views
Nagkaisa ang mga lider ng Simbahang Katolika at mga Evangelical Church sa panawagan ng pananagutan ng mga sangkot sa katiwalian at pag-iral ng katarungang panlipunan sa isinagawang White ribbon march sa EDSA shrine at Edsa people power monument noong ika-28 ng Hunyo, 2026.
Ayon kay Father Joel Saballa, Deputy Executive Director ng Caritas Novaliches, hindi mananahimok ang mga Pilipino lalu na ang mga lingkod ng Simbahan sa panawagang maibalik ang katarungan sa pondong kinamkam ng mga opisyal ng pamahalaan at kasabwat na indibidwal gayundin ng mga kontraktor sa gobyerno.
Iginiit ni Fr. Saballa na kailangang magkaroon ng accountability at maparusahan ang mga tiwaling opisyal upang matigil na ang nakasanayang korapsyon sa pondo ng bayan.
Inihayag ng Pari na ang white ribbon march ay paalala na maraming mga grupo at Pilipino ang humihingi ng accountability sa mga pinuno ng bansa.
“Isang paalala ito sa ating pamalaan sa ating bayan na meron pa rin mga grupo at mga Pilipino nagmamalasakit ukol po sa paghingi ng accountability sa ating mga leader, panagutin natin sila at patuloy tayo pag tayo mapagod na magsalita ukol sa mga usapin ito. Kasi kung titigil tayo, magpapatuloy ang kanilang kahibangan, ang kanilang kasakiman. Ngunit pag tayo patuloy nagsasalita, ay titigil ito sa pamamagitan ng ating pagkakaisa” ayon sa panayam ng Radyo Veritas kay Father Saballa,
Iginiit naman ni Bishop Efraim Tendero, ng Philippine Council for Evangelical Churches na nararapat lamang na patuloy na palakasin ang panawagan sa pamahalaan upang maging maayos ang imbestigasyon sa flood control project scandal at makasuhan ang dapat kasuhan gayundin mapanagot ang dapat managot.
Nanawagan din ang mga lider ng simbahang katolika na manaig ang katarungang nagmumula sa Diyos at sa sambayanang Pilipino upang tuluyang matuldukan ang korapsyon sa bansa.(
