6,343 total reads
Tiniyak ng Catholic Educational Association of the Philippine (CEAP) ang patuloy na paglaban sa katiwalian sa lipunan matapos ang pakikiisa sa White Ribbon March noong June 28 sa National Shrine of Mary, Queen of Peace o EDSA Shrine at sa EDSA People Power Monument.
Iginiit ni Father Wilmer Tria – CEAP Vice President na bilang kinatawan ng 1,500-katolikong paaralan at institusyon na patuloy silang maninindigan upang makamit ang katarungan at maparusahan ang mga sangkot sa katiwalian.
Naninindigan din ang CEAP laban sa pamamayagpag ng political dynasties na nagiging sanhi ng pag-usbong ng mga tiwaling gawain sa pamumuno.
“Meron po tayong more than 1,500 members in the whole country. Kasama ko po ang presidente namin na si Father Karel San Juan. Siya po ang president ng University of Ateneo de Davao. So, nandito kami para i-represent ang association na kami ay nakiki-partner kasama po dito sa White Ribbon March para ipakita natin ang suporta na ayaw natin ng katiwalian, ayaw natin ng corruption,” ayon sa panayam ng Radyo Veritas kay Fr.Tria.
Nanawagan si Fr.Tria sa pamahalaan at mga Pilipino na papanagutin sa batas ang mga tiwaling opisyal na guilty sa panglulustay sa kaban ng bayan.
“In whatever form, ayaw natin ng proliferation ng political dynasties kasi ito yung naglalagay ng impunity. Ibig sabihin talagang hindi mo na mahuli-huli yung may mga kasalanan. nagtataguan and at the same time yung election fraud. Ibig sabihin, kailangan i-reform natin ang eleksyon sa Pilipinas upang mapili natin yung talagang dapat na maging leader ng ating bayan,” ayon pa panayam ng Radyo Veritas kay Fr.Tria.
Inihayag ni Fr. Tria na hindi nagtatapos sa white ribbon march ang kanilang laban para sa katotohanan at katarungan gayundin ang pagkilos upang tuluyang matuldukan ang political dynasties sa bansa.
