325 total views
Kinilala ni Father Erik Adoviso – Minister ng Manila Archdiocesan Ministry for Labor Concern (MAMLC) ang kautusan ng Department of Labor and Employment na 85-pesos na umento sa daily minimum wage sa National Capital Region.
Bunsod ng desisyon ng DOLE, mula sa dating 695-pesos na arawang minimum wage, magiging 780-pesos ang minimum wage ng mga manggagawa sa Metro Manila kapag naipatupad na ang 85-pesos na dagdag sa arawang sahod.
Inihayag ni Fr. Adoviso na malaking tulong sa mga minimum wage earners na apektado ng krisis sa enerhiya, at pagtaas ng presyo ng mga pangunahing bilihin at serbisyo publiko ang 85-pesos na dagdag sahod.
Gayunman, iginiit ng pari na kulang pa rin ang napagdesisyunang umento sa sahod dahil sa patuloy na pagtaas ng halaga ng mga bilihin, pagkain, pamasahe, bayarin sa tubig at kuryente dahil s amabilis na pagtaas ng inflation rate sa una at ikalawang quarter ng taong 2026.
“Malaking tulong ‘yan sa mga minimum wage earner. Kaya sa kaso, siyempre, inutay-utay pa rin. Siguro, hindi ko alam kung bakit hinati-hati pa. Pero kung i-compare mo ‘yan sa mga bilihin natin ngayon, siyempre, kulang pa rin ‘yan. Kulang pa rin ‘yan sa mga pangkaraniwang manggagawa. Kaya siyempre, sana marating natin ‘yung minimum, ‘yung talagang family rates o just rates na tinatawag ng Catholic Social Teaching. ‘Yun ang gusto natin, Pero ito, siguro, malaking tulong na ‘yan para sa mga minimum wage earners.” ayon sa panayam ng Radyo Veritas kay Father Adoviso.
Tinukoy ni Fr.Adoviso na mahalagang hakbang ang wage increase ngunit kinakailangan pa ring maabot ang daily family living wage na base sa IBON foundation ay umaabot ng 1,216-pesos para makapamuhay ng disente ang isang minimum wage earners na sinusuportahan ang 5-miyembro ng pamilya.
“Pero ito, siguro, malaking tulong na ‘yan para sa mga minimum wage earners. Pero again, kung ilulugar natin ‘yan sa mga bilihin ngayon ng bigas, ulam, hindi pa rin niya kakayanin, yung upa sa bahay, maliit na kuwarto na umaabot na sa four thousand pesos a month ang renta, at ilan lang ang nakatira doon? Tatlo, apat—hindi siya kasya. Kaya malaking hakbang, pero ayon sa turo ng Simbahan, sana marating natin ‘yung family just living wage,” ayon pa sa panayam ng Radyo Veritas kay Father Adoviso.
Ang 85-pesos na wage hike ng DOLE ay umaayon naman sa panlipunang katuruan ng Simbahan na nagsusulong ng dignidad ng paggawa at makatarungang pasahod.
Sa July 19, 2026 ipapatupad ang unang bahagi ng wage hike at sa January 2027 naman ang ikalawang bugso ng umento sa sahod hanggang sa maitakda sa 780-pesos ang minimum wage ng mga manggagawang nasa pribadong sektor habang 743-pesos naman sa agricultural sector.
