13,010 total reads
Lubos ang pasasalamat ng pamunuan ng Radyo Veritas sa panginoon sa biyayang ipinagkaloob sa Radyo ng Simbahan.
Taos-puso ding nagpapasalamat si Fr. Roy Bellen, pangulo ng Radyo Veritas sa kabutihang loob ng ASA Philippines sa ibinigay na “board-allocated grant” sa DZRV Radyo Veritas Foundation, Inc., sa ceremonial turnover ng donasyon.
Inihayag ng pangulo ng Radyo Veritas na ang donasyon ng ASA Philippines ay makatutulong ng malaki sa pagpapaigting sa mga adbokasiya ng himpilan at maibahagi sa mas maraming mamamayan ang mabuting balita ng panginoon.
Binigyan-diin ni Fr. Bellen na ang hangaring makatulong ay higit na mahalaga kaysa sa halaga ng donasyon dahil ang bawat mabuting gawa ay nagbibigay ng pag-asa at nagsisilbing inspirasyon sa iba upang makibahagi sa pagkalinga sa kapwa.
“Ang bawat simpleng pagkilos ng kabutihan ay maaaring magbunga ng mas malawak na pagtutulungan. Ang diwa ng pagbabahagi ay may “domino effect” na naghihikayat sa iba na maging bahagi ng paglilingkod.”pagbibigay-diin ni Fr.Bellen sa kabutihan ng ASA Philippines
Ipinaabot naman ng Pari ang buong-pusong pasasalamat sa ASA Philippines sa pagtitiwala at pakikiisa sa mga adbokasiya ng Radyo ng Simbahan na kalingain ang mga dukha at ibahagi sa maraming mamamayan ang salita ng panginoon.
” Tayo pong lahat ay nai-inspire kapag nakakakita tayo ng mga taong handang tumulong. Ang mismong pagkilos na ito is already good news para sa ating lahat. Hopefully, this inspires more people. Minsan kasi ang iniisip ng iba, ‘Ito lang ang kaya kong ibigay, ito lang ang meron ako.’ Hindi po iyon ang mahalaga. The act itself is what inspires more people. Para itong domino effect—kapag may nagbigay, gusto mo ring maging bahagi nito. So hopefully, tayong lahat, it’s not so much about the amount that we can share.
It’s really the act itself. Let’s continue helping and sharing what we have. Kahit simpleng mga pagkilos lamang, malayo ang mararating niyan. Muli, sa ating mga kaibigan mula sa ASA Philippines, maraming-maraming salamat for trusting Radyo Veritas and helping us in all our advocacies. God bless you all,”ayon sa panayam ng Radyo Veritas kay Fr.Bellen.
Ibinahagi naman ni Rafael Lopa, President at CEO ng ASA Philippines foundation ang mas malawak na pakikipagtulungan sa iba’t-ibang sektor upang matulungang makaahon sa kahirapan ang maraming Pilipinong nasa laylayan ng lipunan.
Nilinaw ni Lopa na napahalaga ang pakikipag-ugnayan at pagtutulungan sa mga katuwang na institusyon tulad ng Radyo Veritas dahil hindi sapat ang kakayahan ng iisang organisasyon upang matugunan ang iba’t-ibang pangangailangan ng mga mamamayan.
Naniniwala si Lopa na sa pamamagitan ng Radyo Veritas ay mabibigyan nito gabay at pag-asa ang mga nangangailangan.
Iminungkahi rin ni Lopa ang mas matatag na koordinasyon ng dalawang organisasyon upang matukoy ang mga komunidad na maaari nilang mapagsilbihan nang sama-sama, kabilang ang mga kababaihang nangangailangan ng kabuhayan at iba pang programang tutulong na makaahon sa kahirapan ang mga mahihirap.
Kaugnay nito, patuloy na hinihikayat ng Simbahang Katolika ang pagtutulungan ng iba’t ibang sektor sa paglilingkod sa mahihirap dahil binibigyang-diin ni Pope Leo XIV na ang tunay na pag-asa ay lumalago sa pamamagitan ng pagkakaisa, malasakit, at sama-samang pagkilos para sa kapakanan ng bawat tao.
